Қазақстандық қоғамдық даму институты 2024 жылдан бері Қазақстан Республикасының материалдық емес мәдени мұрасын сақтау, дәріптеу және халықаралық деңгейде ілгерілету бағытындағы мемлекеттік саясатты іске асыруға қатысып келеді, – деп хабарлайды Aikyn.kz сайты.
Биыл негізгі бағыттардың бірі ретінде Қазақстанның материалдық емес мәдени мұра элементтерін ИСЕСКО тізімдеріне енгізуге арналған номинациялық досьелерді дайындау жұмыстары жүзеге асырылмақ. Бұл жұмыс қазақ халқының бірегей дәстүрлерін халықаралық деңгейде танытуға және дәріптеуге, сондай-ақ оларды сақтап, келер ұрпаққа жеткізуге бағытталған.
Тізімге келесі элементтер енгізілді:
- алтыбақан;
- бата беру;
- бәйге;
- бесік жыры;
- жарапазан;
- жеті ата және шежіре тарқату;
- кимешек;
- құрақ құрау;
- сал-серілік;
- шапан мен қамзол кию дәстүрі.
Номинациялық досьелерді дайындау Қазақстанның материалдық емес мәдени мұраны сақтау, зерттеу және халықаралық деңгейде ілгерілету жөніндегі жүйелі жұмысының кезекті кезеңі болмақ.
Материалдық емес мәдени мұра элементтерін ИСЕСКО тізімдеріне енгізу Қазақстанның мәдени мұрасын халықаралық деңгейде тануға және дәріптеуге, мәдени дипломатияны нығайтуға, еліміздің халықаралық беделін арттыруға, сондай-ақ халықаралық ынтымақтастықты кеңейтуге және бірлескен мәдени жобаларды жүзеге асыруға ықпал етеді.
Номинациялық досьелер ИСЕСКО талаптарына сәйкес әзірленеді және ғылыми зерттеулер жүргізуді, элементтерді құжаттауды, фото және бейнетүсірілім жасауды, тасымалдаушылардың келісімін алуды, сондай-ақ халықаралық сарапшылардың қарауына ұсынылатын құжаттардың толық топтамасын рәсімдеу жұмыстарын қамтиды.
Номинациялық досьелерді дайындау жұмыстары Қазақстан Республикасының ұлттық мәдени мұраны сақтау, дәріптеу және халықаралық деңгейде ілгерілету жөніндегі мемлекеттік саясатын іске асыру аясында жүзеге асырылуда.
ИСЕСКО (Білім, ғылым және мәдениет мәселелері жөніндегі Ислам әлемі ұйымы) – Ислам әлемінің 53 мемлекетін біріктіретін мамандандырылған халықаралық ұйым. Ұйым білім, ғылым, мәдениет және мұраны қорғау салаларындағы халықаралық ынтымақтастықты дамытуға бағытталған, сондай-ақ мәдени әралуандылықты сақтау мен халықтар арасындағы диалогты нығайтуға бағытталған бағдарламаларды жүзеге асырады.