Ақтөбеде 68 жастағы әйел үш рет жасалған ампутациядан кейін көз жұмды, – деп хабарлайды Aikyn.kz сайты. Tengrinews.kz сайтына сілтеме жасап. Марқұмның жақындары дәрігерлер уақытында шара қолданғанда, анасының өмірін сақтап қалуға болар еді деп отыр.
Оқиға барысы
Күлшат Шәріпқызы 25 жылдан бері қант диабетімен ауырған. Осы көктемде башпайында қара дақ пайда болып, ол некрозға ұласқан. Дәрігерлер алдымен бір башпайды, кейін екіншісін кесіп тастады. Алайда науқастың жағдайы жақсармай, ауру асқынып кетті.
Туыстарының айтуынша, оң аяғындағы екінші башпайы ампутацияланған соң жара ашық қалып қойған. Кейіннен гангрена асқынып, әйелді қайта ауруханаға жеткізген. Дәрігерлер аяқтың жамбасқа дейін ампутациясын жасауға мәжбүр болды. Бірақ отадан кейін науқас реанимацияда көз жұмды.
Дәрігерлердің түсіндірмесі
Медициналық мекеме өкілдері науқаста қант диабетімен қатар, бүйрек жеткіліксіздігінің соңғы сатысы да болғанын айтады.
«Барлық қажетті медициналық шаралар жасалды, ішкі тексеріс жүргізілді», – деді аурухананың бас дәрігерінің орынбасары Әділбек Исмаилов.
Жақындарының уәжі
Марқұмның қызы Айнұр Амирешева:
«Егер дәрігерлер дер кезінде әрекет еткенде, анам тірі қалар еді. Біз прокуратураға жүгінеміз», – деді.