Бір жылдары Сыр спортының саңлақтары елімізден өзге, әлемдік ареналарда жасындай жарқыраған болатын. Оның ішінде Илья Ильин бастаған сайыпқырандар олимпиада мен әлемдік басты додаларда топ жарып, Қазақстанның Туын көкте желбіреткені көптің жадынан өше қойған жоқ
Сыр спорты саңлақтарымен мақтанады
386
оқылды

Соңғы жылдары Сырдың спорт саласында серпін бар. Бұл тұр­­ғыда алдымен аймақтың спорт саласын қолдау мақса­тын­­­да жергілікті әкімдік пен тиіс­­­ті басқарма тарапынан ат­қа­­рылып жатқан қыруар шаруа­лар­ды жоққа шығаруға болмас. Мемлекет басшысы мен Үкімет­тің ерекше қолдауының арқа­сын­да өңірдегі спорттық инф­ра­құрылымды дамыту жұмыс­тары көпшіліктің қолдауына ие. 

«Жыл басынан бері облыс орталықтары мен аудандарда 10-ға жуық заманауи үлгідегі спорт кешені халық игілігіне та­бысталды. Сонымен қатар 2024 жылы заманауи үлгідегі Үс­тел теннисі орталығы са­лы­нып, спортсүйер қауымның и­гі­­лігіне берілді. Жалпы, бү­гін­де облыста 17 мыңға жуық адам тен­нисті жанына серік етіп, тұ­рақты түрде айналысады. Осы­ған байланысты Қызылорда қа­ласының сол жағалауында Samruk-Kazyna Trust әлеуметтік жо­баларды қолдау қорымен бір­лескен түрде жаңа «Үстел тен­нисі» орталығы ашылды. Жаңа спорт нысанында 16 үстел тен­нисі орналасқан ойын алаңы, жаттығу залы мен әкімшілік бөлмелер бар. Орталықта қазір 5 оқытушы-жаттықтырушы 250-ге жуық спортшыны кәсіби бағытта үйретуде», – дейді Қы­зы­лорда облыстық Дене шы­нық­тыру, спорт және туризм бас­­қармасы басшысының орын­­­­басары Жігер Айекешов. 

Сыр спортын өркендетуде өңірдің спорттық инф­ра­құры­лы­мын дамыту бағытындағы та­ғы бір байыпты бастама – Қы­зылорда қаласының сол жа­ға­лауынан 11 мың орындық жаңа стадионның құрылысы қарқын алды. 

Стадион демекші, аталмыш ны­санның құрылысы бірнеше жыл бойы жырға айналған бо­ла­тын. Бірақ көптің сеніміне сел­кеу түсірген стадион құры­лы­­сына былтыр нүкте қойылды. Нақ­тысын айтқанда, былтыр об­лыс әкімі Нұрлыбек Нәлі­баев­­тың қатысуымен қүны 20,9 млрд теңгені құрайтын халық­ара­лық стандарттарға сай келе­тін жаңа стадионның іргесі қа­лан­ды. Осы орайда айта кеткен аб­зал, жаңа стадионда жасыл алаң­нан бөлек, бірнеше спорт тү­ріне арналған залдар қарас­тырылған. Соның ішінде бокс, күрес, спорттық гимнастика, ауыр атлетика, таэквондо және фит­нес залдары бар. Биыл ел игі­лігіне пайдалануға беру жос­пар­ланып отырған стадион УЭФА классификациясы бойынша ІІІ санатты.

«Сол сияқты «Қазақстан хал­­қына» қоғамдық қоры мен Қы­зылорда облысы әкімдігінің ара­сындағы екіжақты мемо­ран­дум­ға сәйкес Қызылорда қала­сы­ның сол жағалауынан жаңа де­нешынықтыру-сауықтыру ке­шенінің құрылысы қарқын ал­ды. Бұл ғимараттың ерекше­лі­гі сол, мүгедектігі бар жан­дар­дың спортпен шұғылдануына қо­лайлы жағдай туғызады деп кү­тілуде. Бұдан бөлек, облыс ор­та­лығында құны 21 млрд тең­гені құрайтын Kyzylorda Arena кешенінің құрылысы жүргі­зілу­де», – деп ойын жалғады бас­қар­ма басшысының орын­ба­сары. 

Жалпы басқарманың мәлі­ме­­­тіне сәйкес, бүгінде Қызыл­ор­да облысында 1 490 спорт ны­саны бар. Осының негізінде өңір­дегі 1000 адамға шаққанда-ғы спорттық нысандарымен қам­­тылуы 46,2 пайызды құрай­ды екен. Мамандар салаға жа­сал­ған қол­даудың арқасында өңірде бұ­қаралық спортпен ай­на­лы­су­шылар қатары артып келе жат­қа­нын алға тартады. Нақты айт­қанда, биылдың өзін­де об­лыста 342 223 адам спорт­пен жүйе­лі түрде шұғылданып, сәй­ке­сінше, бұл көрсеткіш ай­мақ хал­қының 40,4 пайызын қам­­тып отыр. 

Қазір өңірдің 22 балалар мен жа­сөспірімдер спорт мектебі спорттың 46 түрі бойынша жұ­мыс істейді екен. Онда 670 жат­тықтырушы-оқытушы 22 655 спортшыны тұрақты оқу-жат­ты­ғу процесімен қамтамасыз ету­де. Соңғы уақытта Сыр спор­тын дамыту аясындағы нәтижелі жұмыстардың арқасында өңір спортшылары Әлем кубогынан 2 алтын, Азия чемпионатынан 1 кү­міс, медаль жеңіп алса, ҚР чем­пионаттары мен кубок­тары­нан 67 алтын, 27 күміс, 34 қолаға қол жеткізген.

Қалай дегенде де, Сыр спор­тын­да жетістік көп. Әсіресе, бо­лашағынан зор үміт күт­ті­ре­тін жас спортшылары­мыз­дың аяқ алысы қуан­тады. 

Ербақыт ЖАЛҒАСБАЙ, Қызылорда облысы