Алматыда полиция қызметкерлері ішінде марихуана болған деген күдікпен пошта арқылы келген сәлемдемені алған кәмелетке толмаған жасөспірімді ұстады, – деп хабарлайды Aikyn.kz сайты.
Полицияның мәліметінше, арнайы операцияны Есірткі қылмысына қарсы іс-қимыл басқармасының қызметкерлері жүргізген. Жасөспірім пошта бөлімшесінен сәлемдемені алған сәтте ұсталған.
Тергеу нұсқасына сәйкес, ол сәлемдемені танысының өтініші бойынша алған. Алдын ала мәлімет бойынша, жеткізуді рәсімдеу кезінде жасөспірімнің фотосуреті заңсыз пайдаланылып, электрондық құжат арқылы алушы ретінде көрсетілген.
Қазіргі уақытта полицейлер сәлемдеменің қайдан жіберілгенін және оған қатысы бар барлық тұлғаны анықтап жатыр. Аталған дерек бойынша сотқа дейінгі тергеу басталды.