Шығыс Қазақстан облысындағы «Востокцветмет» ЖШС-не қарасты Артемьев шахтасында жазатайым оқиға болып, жұмысшы қаза тапты, – деп хабарлайды Aikyn.kz сайты
Алдын ала мәліметке сәйкес, қайғылы жағдай 9 мамыр күні жөндеу жұмыстары барысында болған.
Кәсіпорынның баспасөз қызметінің хабарлауынша, шаң-сору және желдету қызметінің механигі шамамен 9 метр биіктіктен құлап кеткен. Ер адам оқиға орнында көз жұмған.
Оқиғаның барлық мән-жайын анықтау үшін арнайы комиссия құрылды. Қазіргі уақытта тергеу амалдары жүргізіліп жатыр.
«Востокцветмет» ЖШС өкілдері қаза болған қызметкердің отбасы мен жақындарына көңіл айтып, оларға қажетті көмек пен қолдау көрсетілетінін мәлімдеді.