Облыстық партия филиалының «Жастар Рухы» жастар қанатының ұйымдастыруымен өткен биылғы жарыс – Бастауыш партия ұйымдарының жылына арналып, оған аудан, қалалардың атынан жасақталған 17 команда қатысты.
Қазығұрт ауданы Жаңабазар елді мекеніндегі спорт алаңшаларында өткен турнирдің ашылуына «AMANAT» партиясы Түркістан облыстық филиалының төрағасы, Түркістан облыстық мәслихатындағы партиялық фракция жетекшісі Алтынсары Үмбетәлиев қатысып, жолдастық кездесу өткізіп жатқан партияластарды Республика күні мерекесімен және турнирдің ашылуымен құттықтады.
– Республика күні – халқымыздың рухын көтеріп, елдігімізді нығайтатын, бірлігімізді бекемдеп, ынтымағымызды арттыратын ұлық мереке. Ұлт тарихындағы жарқын мереке қарсаңында партияның бастауыш ұйымдары арасында достық пен серіктестікке негізделген спорттық шараның алғаш мәрте өткізілуі – үлкен жауапкершілік әрі қуанышты оқиға. Бұл турнир – партия ішіндегі ұйымшылдықты арттыратын, ортақ мақсат пен мүддені біріктіретін жаңа дәстүрдің бастауы. AMANAT CUP жобасы – партияластар арасындағы достық көпірін нығайтып, ортақ идея мен көзқарасты біріктіретін ізгілікті бастама. Бастауыш партия ұйымдарының белсенділігі – партияның тірегі, ал сіздер – сол тіректің ең сенімді бөлігісіздер. Себебі мұндай шаралар тек спорттық рухты емес, партиялық бірлікті, елдік жауапкершілікті қалыптастырады. Барша қатысушыларға әділ ойын, жарасымды көңіл күй және шынайы командалық рух тілеймін! – деді Алтынсары Дүйсенбекұлы.
Сондай-ақ іс-шара барысында Қазығұрт ауданының әкімі Азизхан Исмайлов та қатысушыларды мерекемен құттықтап, жарыстың маңызын атап өтті.
– Республика күні – елдігімізді дәріптейтін, ұлт рухын көтеретін ерекше күн. Бұл мерекенің аясында өткізілген бүгінгі AMANAT CUP турнирі – ұйымшылдық пен достықтың, серіктестік пен ынтымақтың айқын көрінісі. Мұндай спорттық сайыстар қоғамда белсенділік пен жігерлі рухты қалыптастырып, жастар мен партия мүшелерін ортақ мақсатқа жұмылдырады. Қазығұрт жерінде өткізіліп отырған осындай ауқымды шаралар тұрғындарды бірлік пен өзара құрметке үндейді. Барша командаға сәттілік, әділ ойын және жеңіс жолында табыс тілеймін! – деді Азизхан Исмайлов.
Жарыс жолына түскен командалар жеребе бойынша іріктелді. Барлық команда 4 негізгі топ бойынша жарысқа түсті. Топтық ойындардан үздік шыққан командалар финалдық ойындарға жіберілді.
Жарыс нәтижесімен үшінші орынға Қазығұрт ауданының командасы лайық деп танылса, екінші орынға Түркістан ауданының командасы табан тіреді. Жетісай ауданынан келген партияластар жеңіс тұғырына көтерілді.
Жеңіс тұрғырынан көтерілген командаларды «AMANAT» партиясы Түркістан облыстық филиалы атқарушы хатшысының орынбасары Полат Тұрсынбаев марапаттап, қызықты ойын көрсеткен барлық қатысушыға алғыс айтты.
Назгүл НАЗАРБЕК,
Шымкент қаласы