Тараптар күн тәртібіндегі өзекті мәселелерге назар аударып, ТүркПА аясындағы өзара іс-қимылды одан әрі арттыру тетіктерін талқылады.
Кездесуде Әзербайжанның Габала қаласында өткен Түркі мемлекеттері ұйымының ХІІ саммитінің қорытындысы кеңінен сөз болды. Нақты айтқанда, экономиканың негізгі секторлары бойынша ТМҰ-ға мүше мемлекеттердің интеграциясын нығайтуға, халықаралық мәселелерде өзара қолдауға, өңірлік қауіпсіздікті қамтамасыз етуге және мәдени-гуманитарлық іс-қимылды дамытуға арналған Габала декларациясының негізгі бағыттары талқыланды.
«Біздің кездесуіміз елдеріміздің өзара іс-қимылының жоғары деңгейін растап, түркі интеграциясының жаңа бағдарын белгілеп берген Габаладағы Түркі мемлекеттері ұйымының саммитінен кейін өтіп отыр. Қазақстан Президенті Қасым-Жомарт Кемелұлы Тоқаев сол жиында түркітілдес халықтардың жақындығына ерекше тоқталған болатын. Мемлекет басшысы түбі бір түркі жұртының тарихы тамырлас екенін және бізді ортақ құндылықтар біріктіретінін тілге тиек етті. Мұның бәрі берекелі бауырластығымыз бен ынтымағымыздың жарқын көрінісі екені анық. Габала саммитінің нәтижелері Парламенттік Ассамблея аясында ынтымақтастықты одан әрі нығайтуға, келісілген заңнамалық тәсілдерді әзірлеуге және бірлескен жобаларды іске асыруға оң септігін тигізеді деп сенемін», – дей келе Мәулен Әшімбаев Қазақстан ТүркПА-ның қазіргі төрағасы ретінде Ұйымның түркі мемлекеттері мен халықтарының игілігін көздейтін бастамаларына жан-жақты қолдау көрсетуге дайын екенін айтты.
Сонымен қатар тараптар қазір ТүркПА түркі интеграциясында парламентаралық диалогты нығайтатын және елдердің заңнамалық бастамаларын үйлестіретін маңызды алаң ретінде ерекше орын алатынына назар аударды. Сенат Төрағасы өз сөзінде бұл бағыттағы ынтымақтастықтың перспективаларына да тоқталып өтті.
«Қазақстан Парламенті ТүркПА аясында белсенді ынтымақтастықты арттыруға және жаңа бастамаларды жүзеге асыруға мүдделі. Қазіргі таңда түркі елдерінің парламенттік дипломатиясы белсенді дамып келеді. Сондықтан ортақ үйлестіруші орган – ТүркПА хатшылығының қызметін одан әрі жетілдірудің маңызы зор», – деді Мәулен Әшімбаев.
Ал Рамиль Гасанов биыл маусым айында Астанада ТүркПА-ның пленарлық сессиясы сәтті өткізілгенін айтты. Аталған сессияда бірқатар модельдік заңдар қабылданып, ТүркПА-ның 14-пленарлық сессиясының Астана декларациясы мақұлданған болатын. Сондай-ақ Түркі мемлекеттері Парламенттік Ассамблеясының Бас хатшысы тығыз ынтымақтастық және парламентаралық байланыстарды нығайту жолындағы белсенді жұмыс үшін ризашылығын білдірді.
Сұхбат кезінде қазақ-әзербайжан арасындағы екіжақты іс-қимылды әрі қарай дамыту мәселелері де сөз болды. Бұдан басқа, Әзербайжан мен Армения арасындағы бейбіт қатынастар туралы декларацияның маңызына мән берілді.