Қаржы вице-министрі Әсет Тұрысов Орталық коммуникациялар қызметінде өткен баспасөз конференциясына қатысып, мемлекеттік қаржыны цифрлы трансформациялау бағытындағы негізгі жоба – «Тауарлардың ұлттық каталогі» мемлекеттік деректер базасын (ҰКТ МДБ) енгізу жөнінде айтты, – деп хабарлайды Aikyn.kz.
Тауарлардың ұлттық каталогі – еліміздегі барлық тауардың бірыңғай цифрлы эталоны. Онда әр тауар бірегей GTIN/NTIN кодымен белгіленіп, бұл мәлімет сауда мен кеденнен бастап мемлекеттік сатып алулар мен бюджетті жоспарлауға дейінгі барлық негізгі процесте қолданылатын болады.
Қазіргі таңда:
• Қазір базада 15 млн тауар бар. Күн сайын 10+ млн чек туралы мәліметтер келіп түседі.
• Каталог қазірдің өзінде ретейлмен, сауда алаңдарымен, ФДО, БКМ, ЭШФ, кеден, мемлекеттік жоспарлау және тауарларды есепке алу жүйелерімен байланыстырылған.
• Бизнеспен 11 API-сервис интеграцияланды.
• Қолданыстағы анықтамалықтардағы он мыңдаған код салыстырылды.
2026 жылдың 1 қаңтарынан бастап барлық өндіруші мен импорттаушылар тауарларды ТҰК-да тіркеуге міндетті болады. Тиісті заңға қол қойылып, Жол картасы әзірленді.
ТҰК артықшылықтары:
• Тауар айналымының ашықтығы;
• Сапа мен жарамдылық мерзімін бақылау;
• Контрафактіге қарсы күрес;
• Мемлекеттік сатып алулар мен мемлекеттік қолдау шараларына қатысуды жеңілдету.
«Тауарлардың ұлттық каталогін енгізу сауданың 20-ға жуық саласын қамтиды және бірыңғай деректер стандартын жасайды, бұл басқарудың тиімділігін арттырып, тұтынушыларды қорғау мен бизнестің жұмысын жеңілдетеді», – деді Әсет Нұрланұлы.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.