Президент Қасым-Жомарт Тоқаев танымал демалыс орындарында сервис сапасының төмендігіне, инфрақұрылымдардың дайындығының нашарлығына және санитарлық проблемаларға жол бермеуді тапсырғаны белгілі. Сондықтан Мемлекет басшысының тапсырмаларын орындау мақсатында Үкімет елдің туристік аймақтарын тиісті жағдайға келтіру жөнінде шұғыл шаралар қабылдады. Бүгінде туристік басым бағыттардың жай-күйін бағалау үшін Премьер-Министрдің орынбасары Ермек Көшербаев өңірлерге жұмыс сапарларын бастады, - деп хабарлайды Аikyn.kz сайты.
Вице-премьер Ермек Көшербаев бірінші нысанын Қонаев қаласындағы Қапшағай су қоймасының жағалауынан бастады. Қапшағай су қоймасы — ішкі туризмнің ең көп адам жиналатын бағыттың бірі. 2025 жылдың бірінші жартыжылдығында оның жағалауына 860 мыңнан астам адам келді. Өңірде 140 туристік нысан, оның ішінде 8 коммуналдық жағажай бар.
Сапар барысында Ермек Көшербаев қонақтарды орналастыру объектілерінің, жағажай және жол инфрақұрылымының жай-күйімен, аумақты санитарлық күтіп ұстаумен, қоғамдық тәртіпті қамтамасыз ету және шұғыл қызметтердің дайындығымен танысты. Вице-премьер аймақ әкімдігіне биылғы күзге дейін солтүстік жағажайға баратын жолдың жұмыстарын аяқтауды тапсырды.
Бизнес өкілдері мен өңір тұрғындары туристік аймақтың проблемалық мәселелерін айтты. Инфрақұрылымдық шектеулерге ерекше назар аударылды. Мәселен, кәсіпкерлер қосалқы электр стансаларының жетіспеушілігін, орталықтандырылған кәріз жүйесінің жоқтығын және инженерлік желілердің шамадан тыс жүктемемен жұмыс істеп тұрғанын атап өтті. Қаншама инвестиция салынып жатқанына қарамастан, жергілікті атқарушы органдар тарапынан жүйелі шешім болмаса туристік аймақтың тұрақты дамуы мүмкін емес. Мәселен, жағажайларда 280 дәретхана бар, олардың санитарлық-гигиеналық қызметі үнемі бақылауды және нақты үйлестіруді қажет етеді.
Басымдықтардың қатарында қауіпсіздікті қамтамасыз ету және төтенше жағдайларға дайындық қарастырылып отыр. Премьер-Министрдің орынбасары Төтенше жағдайлар министрлігіне жағажайлардағы барлық құтқару кабиналарын талаптарға сай етуді және профилактикалық жұмыстарды күшейтуді тапсырды. Сондай-ақ жұмыс сапары аясында инженерлік жүйелер мен санитарлық-эпидемиологиялық қызметтердің демалушылардың жаппай ағынына дайындығы, әсіресе 15 мың адамға дейін қатысатын іс-шараларды өткізу мәселелері талқыланды.
– Коммуналдық жағажайлар тазалық пен қызмет көрсету сапасы бойынша стандарттарды ұстануы керек. Жайма базар, «көлеңкеде» жұмыс істеуге жол беруге болмайды. Түбіртектер, терминалдар, салықтық тіркеу болуы керек. Адамдарды бала кезінен бастап тәртіп пен заңға үйрету қажет. Билік тарапынан ағымдағы мәселелерді жою ғана емес, жүйелі түрде тәртіп орнату және азаматтардың күткеніне сай жағдай жасау маңызды. Туризм – бұл елдің бет-бейнесі. Алакөл, Қапшағай, Балқаш сияқты табиғи аймақтарды салу кезінде жағалау сызығының өзгергіштігін ескеру, күзет аймақтарын салу, халықпен түсіндіру жұмыстарын жүргізу қажет. Мұның барлығына жергілікті атқарушы органдар жауапты, – деді вице-премьер.
Сапар барысында туристік аумақтарды аймақтарға бөлу бойынша пилоттық жоба ұсынылып, жағалауды функционалды аймақтарға, яғни рекреациялық, табиғатты қорғау, инфрақұрылымдық және өзге де учаскелерге бөлуді қарастырады. Бұл – аумақтың дамуын тиімдірек басқаруға, экологиялық тепе-теңдікті сақтауға және демалушылар мен инвесторлар үшін жайлылықты қамтамасыз етуге мүмкіндік береді.
Сонымен, жұмыс сапары жалғасуда. Барлық туристік нысандарды аралау аяқталғаннан кейін өңір әкімдерінің және уәкілетті мемлекеттік орган басшыларының қатысуымен кеңейтілген жиын өткізіліп, кемшіліктерді жою барысында шаралар айқындалады.