Ақуыз – ағзаның дұрыс жұмыс істеуі үшін қажетті маңызды макроэлемент. Ол бұлшық ет массасын сақтау, тіндерді қалпына келтіру, шаш, тері және тырнақ саулығын қамтамасыз ету сияқты көптеген қызметті атқарады, – деп хабарлайды Aikyn.kz Аlmaty.tv-ге сілтеме жасап.
Ақуыз жеткіліксіздігіне кейде байқала бермейтін белгілер тән. Төменде мамандар ұсынған ақуыз жетіспеушілігінің бес негізгі белгісі келтірілген:
Үнемі ашығу сезімінде жүру
Тамақтанғаннан кейін де тез арада ашығуды сезіну ақуыз жеткіліксіздігінің белгісі болуы мүмкін. Ақуыз тойымдылық сезімін ұзақ уақыт сақтауға көмектеседі. Сондықтан егер адам үнемі аштық сезінсе, оның рационында ақуыздың жеткілікті мөлшерде екеніне көз жеткізу қажет.
Жаралардың баяу жазылуы
Ақуыз тіндерді қалпына келтіру және коллаген түзу үшін маңызды. Оның жетіспеушілігі кесілген немесе жарақаттанған жерлердің баяу жазылуына әкелуі мүмкін.
Бұлшық ет өсуіндегі қиындықтар
Тұрақты жаттығу жасап жүрген адамдар да егер рационында ақуыз жеткіліксіз болса, бұлшық ет массасын арттыруда қиындықтарға тап болуы мүмкін. Ақуыз бұлшық ет тіндерін қалпына келтіру және өсіру үшін қажет.
Шаштың түсуі
Шаш фолликулдары табиғи циклін сақтау үшін ақуызға мұқтаж. Ақуыздың жеткіліксіздігі жаңа, сау шаш фолликулдарының түзілуін тежеп, шаштың түсуіне себеп болуы мүмкін. Бұл жағдай көбінесе қайтымды, бірақ кейде созылмалы сипат алады.
Тырнақтың сынғыштығы
Тырнақ негізінен құрылымдық ақуыз – кератиннен тұрады. Ақуыздың жеткіліксіздігі тырнақтардың құрғап, сынғыш болуына әкеледі. Сонымен қатар кальций, С дәрумені, биотин (В7 дәрумені) және Е дәрумені сияқты басқа да қоректік заттар тырнақ саулығы үшін маңызды.
Ақуыз тұтынуды қалай арттыруға болады?
Күнделікті рационға ақуызды қосу қиын емес. Мысалы, грек йогуртының мөлшерін арттыру, жұмыртқаға сүзбе қосу немесе кофеге коллаген ұнтағын араластыру сияқты қарапайым өзгерістер арқылы ақуыз тұтынуды көбейтуге болады.
Сондай-ақ ақуыз жетіспеушілігімен күресу үшін рационға ақуызға бай тағамдарды қосу қажет. Бұған ет, балық, жұмыртқа, сүт өнімдері, бұршақ, жаңғақ түрлері және соя өнімдері жатады.
Алайда ақуызды шамадан тыс тұтынудың да, әсіресе бүйрек ауруы бар адамдар үшін зияны болуы мүмкін. Сондықтан жеке қажеттілікке қарай ақуыз мөлшерін диетологтің кеңесімен реттеген жөн.