Алматыдағы Назарбаев зияткерлік мектебінде мұғалім мен оқушының арасында болған келеңсіз жағдайға байланысты Оқу-ағарту министрлігі ресми мәлімдеме жасады, – деп хабарлайды Aikyn.kz сайты.
Оқиғаға байланысты министрдің тапсырмасымен Бала құқықтарын қорғау комитетінің төрағасы шұғыл барып, мектеп ұжымы және оқушының ата-анасымен, өзімен кездескен.
"Оқу-ағарту министрінің тапсырмасымен күні кеше Алматы қаласына Балалардың құқықтарын қорғау комитетінің төрағасы шұғыл түрде іссапармен барды. Ол «НЗМ» ДББҰ Басқарма төрағасымен, ҚР Оқу-ағарту министрлігінің аумақтық департаментінің өкілдерімен, өңірлік Бала құқықтары жөніндегі уәкілмен және қоғамдық кеңес мүшелерімен бірлесе отырып, мектеп ұжымымен, оқушының ата-анасымен және өзімен кездесті", – дейді министрлік.
Министрлік мұғалімге құрмет көрсету мемлекеттік саясаттың басым бағыты болып қала беретінін айтады.
"Ашық әрі сындарлы диалог барысында орын алған жағдай жан-жақты зерделеніп, баланың әрі қарай білім алу жолдары қарастырылды. Бұл ретте шешім заңнама талаптарына сай, баланың құқықтары мен мүдделерін, оның ішінде толыққанды білім алу құқығын ескере отырып қабылданды. ҚР Оқу-ағарту министрлігі педагогке құрмет көрсету мен оның кәсіби пікірімен санасуды білім беру ортасының негізін құрайтын маңызды қағидаттар ретінде атап өтеді. Тағы да бір мәрте ескертеміз: Қазақстан Республикасының «Педагог мәртебесі туралы» заңының нормаларын қатаң сақтау қажет. Мұғалімге құрмет көрсету мен қауіпсіз білім беру ортасын қамтамасыз ету — білім беру саласындағы мемлекеттік саясаттың басым бағыттарының бірі болып қала береді", – делінген министрліктің хабарламасында.