Бұл шара жас буынның техникалық қабілетін паш етіп қана қоймай, олардың болашаққа сенімі мен ұмтылысын нақты көрсетті.
Фестивальда ерекше көңіл күй мен технологиялық серпіліс лебі сезілді. Залдағы роботтар, дрондар, жарыс алаңдары – бәрі де балалардың еңбегі мен ізденісінің айғағы іспеттес. Қырғызстаннан келген командалардың қатысуы фестивальдың халықаралық мәртебесін арттырып, жастар арасындағы ынтымақтастық пен достықты нығайтты. Мұндай ауқымды бастамалар жарыс қана емес, болашақты бірге құруға бағытталған стратегиялық қадам. Бұл шара арқылы жасөспірімдер әлемдік ғылым кеңістігіне енуге алғашқы нақты қадамдарын жасап отыр. Сонымен қатар фестиваль аясында өткен пікірталастар мен семинарлар жастардың білім көкжиегін кеңейтіп, жаңа технологиялық шешімдер мен инновациялық ойлау қабілеттерінің маңызын тереңірек түсінуге ықпал етті.
Фестивальды ұйымдастыруға еңбек сіңірген мекемелердің үлесі ерекше. Олардың қатарында Астана қаласының Білім басқармасы, Л. Гумилев атындағы ЕҰУ, Astana IT University, KAZ ROCKETS қоғамдық қоры, «Әлихан Мақсұт атындағы дарынды балаларды қолдау қоры», My Extra Lab ЖШС, «Дарын» республикалық ғылыми-практикалық орталығы, елордадағы бірқатар білім ордасы – №9 «Зерде» мамандандырылған лицейі, «Роботек» білім беру робототехника мектебі, «Астана дарыны» дарынды балалар мен талантты жастарды анықтау және қолдау орталығы бар. Бұл ұйымдар фестивальды жоғары деңгейде ұйымдастырып, жас дарындардың болашағы үшін пайдалы болатын алаң ұсынды. Мұндай жобалар – қоғам мен мемлекеттің болашаққа деген жауапкершілігінің көрінісі. Қатысушыларға барлық жағдай, техника, жарыс алаңдары, ақпараттық қолдау жасалған. Фестивальда ата-аналар мен педагогтер де жас дарындардың жетістігіне куә болып, балалармен бірге қуанды.
Жарыс барысында түрлі номинация ұсынылып, жас қатысушылар тек техникалық емес, шығармашылық, логикалық, стратегиялық қабілеттерін де көрсете білді. Фестиваль қорытындысы бойынша жеңімпаздар келесі номинациялар бойынша жүлдеге ие болды: «Басқару симуляторы» санаты бойынша Нсанбаев Алихан (Батыс Қазақстан облысы); My Extra Case Competition шығармашылық санаты бойынша Codi Science командасы (Астана қаласы); «Инверсті сызық бойымен жарыс» санаты бойынша Robo Com командасы (Астана қаласы); «Мерген» санаты бойынша Aloft командасы (Көкшетау қаласы); Micro-FPV санаты бойынша Тимофей Муравьев (Қарағанды қаласы); «Дрон футболы» санаты бойынша «ОБТШО» командасы (Батыс Қазақстан облысы). Жеңімпаздарға диплом, медаль, ақшалай сыйлық пен кубок табысталды. Қатысушылардың бойындағы жаңашылдық, ізденіс, батыл қадамдар еліміздің ғылыми-технологиялық дамуына үлес қосатыны сөзсіз.
«Robozerde-2025» фестивалі – жасөспірімдердің ғылыми-техникалық қабілетін дамытып, олардың заманауи технологиялар саласындағы әлеуетін танытатын маңызды алаңға айналды. Мұндай бастамалар – еліміздің инновациялық болашағына бағытталған нақты қадамдардың бірі. Фестиваль барысында көрсетілген жобалар мен бастамалар жастардың техникалық шығармашылығының жоғары деңгейін көрсетті. Фестивальдың маңызы ғылыми жетістіктермен ғана шектелмейді, ол жастарға өз мүмкіндігін ашуға, жаңа технологияларды меңгеруге және бір-бірімен тәжірибе алмасуға мүмкіндік береді. Бұл алаңда жас дарындар болашақтың ғылымы мен технологиясына қадам басып, еліміздің дамуына үлкен үлес қосуға дайын екенін көрсетті.
Тоғжан НҰРҚАНОВА