Neurology журналы жариялаған ғылыми зерттеуге сүйенген Aikyn.kz ұзақ уақыт алкоголь тұтыну мен ерте өлімнің арасындағы байланыстың себептерін талдайды.
Ұзақ уақыт алкоголь тұтыну ерте өлімге әкеледі. Фото leveluplakeworth.com сайтынан алынды
Шамадан тыс алкоголь тұтыну тек бауырға ғана зиян келтірмейді. Жаңа зерттеулер оның ми көлемін кішірейтіп, жадты нашарлатып, өмір сүру ұзақтығын қысқартатынын көрсеткен. Жақында жүргізілген зерттеу ұзақ уақыт алкоголь тұтыну мен когнитивті қабілеттің нашарлауына және ерте өлімге әкелетін ми зақымдары арасында сенімді байланыс бар екенін анықтаған.
Зерттеу Сан-Паулу университеті ғалымдарының жетекшілігімен жүргізіліп, оның нәтижелері Neurology журналында жарияланды. Ғалымдар 1800-ге жуық адамның миына жасалған аутопсия нәтижелерін зерттеген. Бұл деректер Ұлыбританияның UK Biobank базасымен салыстырылып, алкоголь тұтыну мен неврологиялық денсаулық арасындағы байланыс талданды.
Аутопсия нәтижелері бойынша адамдар төрт топқа бөлінді:
1-ші топ – өмір бойы ішімдік ішпегендер; 2-ші топ – орташа деңгейде алкоголь тұтынғандар,
3-ші топ – бұрын қатты ішкен, бірақ кейін тастағандар; 4-ші топ – ішуді өмірінің соңына дейін жалғастырған маскүнемдер.
Алынған деректерге сүйене отырып, зерттеушілер шамадан тыс алкоголь тұтыну миды зақымдайды деген қорытынды жасаған. Сондай-ақ, бұл жағдай гиалинді артериолосклерозбен тығыз байланысты екені анықтады. Бұл ми ішіндегі ұсақ қан тамырларының қатайып, тарылуы, нәтижесінде қан айналымы бұзылып, мидың зақымдану қаупінің өсуі.
Алкоголиктердің миында Альцгеймер ауруы мен деменцияға тән тау-ақуыз түйіндері көбірек табылған. Фото evokewellnessfl.com сайтынан алынды
Бразилиялық ғалымдардың айтуынша, тамыр жүйесіндегі мұндай өзгерістер есте сақтау мен ойлау қабілетіне кері әсер етеді. Сондықтан оның алкогольмен байланысы миға келетін ұзақ мерзімді зиянды дәлелдей түседі. Тіпті ішімдікті тастағандардың өзінде де қауіп сақталады. Тағы да алаңдатарлық жайт – ішуді қойған адамдардың өзінде де ми зақымдануы мен жүйке жүйесінің бұзылуы байқалған. Бұл – организмдегі зиянның бірден жойылмайтынын көрсетеді.
Бұрынғы алкоголиктердің миында Альцгеймер ауруы мен деменцияға тән тау-ақуыз түйіндері көбірек табылған. Сондай-ақ, олардың ми көлемі дене өлшеміне қатысты кішірейген, ал когнитивтік тест нәтижелері төмен болған.
Мынадай видеолар әзіл болса да, анти-алкогольді насихат болады деп ойлаймыз:
Ең қорқынышты статистика – шамадан тыс ішімдік ішетін адамдардың өмірі орта есеппен 13 жылға қысқарады. Бұл зерттеу тікелей себеп-салдарлық байланыс орнатпағанымен, алкогольдің миға ұзақ мерзімді әсері туралы түсінікті қайта қарастыруға негіз береді. Тіпті орташа мөлшерде ғана алкогольді ішімдіктерді тұтынудың өзі зиянды болуы мүмкін деген пікірді күшейтеді.
Алынған дәлелдер алкогольдің миды зақымдайтыны шынайы және бұл зақым алғашқы белгілер білінбей тұрып-ақ басталуы мүмкін екенін көрсетеді.
Зерттеу нәтижелері алкогольдің миды зақымдап, когнитивті қабілетті төмендететінін және өмір сүру ұзақтығын қысқартатынын дәлелдеді. Жастардың миы өзгерістерге тез икемделетіндіктен, оған кері әсер ететін факторлар да ұзақ мерзімді зиян келтіреді. Сондықтан алкоголь әсіресе жастар үшін қауіпті, себебі жас кезден басталған зақым ерте қартаюға және өмір бойы ойлау қабілетінің нашарлауына алып келуі мүмкін.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.