Алматыда түрлі мекемелер мен саяси ұйымдар сайлау қорытындысына байланысты бас қосып, үлкен саяси дода кезінде қандай жұмыс атқарылғанын кеңінен талқылап жатыр. Сондай жиынның бірі «Алматыинжстрой» мекемесінде болды. Аталған бастауыш партия ұйымының қолға алуымен арнайы дөңгелек үстел өтті.
«Алматыинжстрой» бүгінде отандық құрылыс нарығындағы беделді ұжымдардың бірі саналады. Мекеме партия өміріне де белсенді араласып, алға қойған мақсаттарды бірге еңсеруге атсалысып келеді. Ұжымның ішкі бірлігі, әділ әрі сапалы басқарудың арқасында бұл мекеме өткен сайлауға белсенді қатысып, ел үшін маңызды таңдауға үлкен үлес қосты. Дөңгелек үстелге ұжым мүшелері де қатысып, пікірлерін білдірді. Ал жиынды Жетісу аудандық қоғамдық штаб жетекшісі Тамара Шәкірова басқарып отырды.
– Сайлау аман-есен өтті. Оған үлкен күшпен атсалысқан Асхат Қашқынбайұлы басқарып отырған мекемеге үлкен алғыс білдіремін. Жалпы, Жетісу ауданында біздің кандидатымыздың сайлауалды кампаниясы өте жоғары деңгейде жүрді. Осы аудандағы барлық кәсіпорындар ерекше түсіністікпен қарап, қолдау білдірді. Қасым-Жомарт Тоқаевты қолдау арқылы біз өз еліміздің жарқын болашағын таңдадық. Осыған дейін де билік бізді үнемі қолдап отырды. Шүкір, қаншама қиын-қыстау шақ басымызға орнаса да, Елбасымыздың саясаты арқасында одан сытылып шығып отырдық. Тәуелсіздік алғалы бері жалақы қанша рет өсті, қаншама мекемелер жетілді, өндіріс аясы кеңейді, зейнетақы да жылдан жылға артып келе жатыр. Осының бәріне тәубемен қарау керек. Бүгін сіздердің араларыңыздан қаншама жастарды көріп отырмын. Осындай іргелі мекемеде жастардың көп екені қуантады. Ертеңгі күні сіздер ел тұтқасын ұстайсыздар. Сөйтіп, қазіргі игі дәстүрді жалғайсыздар. Жастардың билікке келу керек екенін Президентіміз Тоқаевтың өзі осы жолы баса айты, – деді ол ашылу сөзінде.
Өз кезегінде «Алматыинжстрой» басшысы Асхат Шілікбаев та сайлау нәтижесіне орай пікір білдірді.
– Біздің ұжым сайлауға түгел қатысты. Қызметкерлердің саяси белсенділігі жоғары екенін осы жолы анық байқадым және риза болдым. Бізде жастар да көп. Барлығының азаматтық ұстанымдары қалыптасқан, жан-жақты ойлай алады, өз істерін жетік біледі және елдегі жағдайларға да бейжай қарамайды. Ондай адамдар өзінің қолға алған шаруасын да дөңгелетіп әкетері анық. Сайлау – біздің ұжымның белсенді, ұйымшыл, бірлігі бекем мекеме екенін тағы бір мәрте дәлелдегендей болды, – деді ол.
Осыдан соң сөз алған Жетісу аудандық партия филиалы төрағасының бірінші орынбасары Мұрат Омаров Қасым-Жомарт Кемелұлын таңдаудың мәні мен маңызына тоқталды.
– Біз мұнда бекерден бекер келіп отырған жоқпыз. Себебі, «Алматыинжстрой» – Жетісу ауданындағы ең іргелі, ең жақсы ұжым. Қасым-Жомарт Тоқаев сайлауалды бағдарламасында «Сабақтастық. Әділдік. Өрлеу» ұранын негіз етіп алды. Бәріміз әділдікті қалаймыз. Ал сабақтастық барлық жерде бар. Салт-дәстүрден бастап тіліміз, діліміз, ұлттық мұратымызға дейін әкеден балаға, баладан немереге жалғасып жатыр. Ал өрлеу – кім-кімнің де қалайтын дүниесі. Тоқаев Елбасымыз қалыптастырған саясатты жалғастырып, елдегі тұрақтылықты табысты сақтауға және одан ары дамытуға күш салмақ. Бұл әрине, қолдауға тұрарлық жағдай, – деді Мұрат Сағатұлы.
Жиын модераторы Тамара Шәкірова жиналғандарға алғыс білдіріп, әркез осында бірлік пен ынтымақ биігінен көрінуге шақырды.
Абай ҚАЗБЕКҰЛЫ