Атырау облыстық Nur Otan партиясы филиалы мен облыстық әкімдіктің қолдауымен Құрманғазы атындағы мәдениет үйінде «Ұлы даланың көне сарындары» атты дәстүрлі музыка фестивалі өтті.
Музыка фестивалі «Айналайын Ақ Жайық, ат салмай өтер күн қайда?!» деп бабаларымыз жырлаған Ақ Жайық – Атырау жеріне жеткенше еліміздің біраз өңірінде халықтың ықыласына бөленді.
«Ұлы даланың көне сарындары» дәстүрлі музыка фестивалі киелі жеріміздің тарихы мен тағдырын кестелі тілмен, әдемі әуенмен кейінгі ұрпаққа насихаттауды мақсат етеді. Топырағынан Қазтуған мен Шалкиіз, Махамбет пен Шернияздай ұлылар тамыр тартқан, Әзидолла, Рыспай, Қаршыға мен Бақыт, Айгүлдей дүлдүл күйшілер түлеп ұшқан Атырауда жалғасын тапқан дәстүрлі музыка фестивалінің өскелең ұрпаққа берері мол болмақ.
Ұлт үшін тағылымды шара шымылдығын ашқан Атырау қаласы әкімінің орынбасары Ұлықбек Тінәлиев аталған фестивальдің қазақ өнерін насихаттаудағы ерекше маңызын атап өтті.
– Фестивальдің мақсаты – жыр, терме, ән-күй секілді дәстүрлі музыка өнерін кеңінен насихаттап, өскелең ұрпақты ұлттық рухта тәрбиелеуге үлес қосу. Nur Otan партиясының 20 жылдығы аясында өтіп жатқан шара –ұлттық құндылықтарды дәріптеуге бағытталған игі істердің жалғасы, – деді Ұлықбек Серікұлы.
Атырау облыстық Nur Otan партиясы филиалы төрағасының бірінші орынбасары Н.Ожаев, атақты «Қыз Жібек» фильмімен елімізге танылған әйгілі актриса Меруерт Өтекешова мен өнерсүйер жұртшылықтың қатысуымен өткен фестиваль шымылдығын жергілікті этно-фольклорлық SARMAD ансамблі «Көшпенділер рухы» әуенімен ашты.
Дәстүрлі музыка кешінің тізгінін есімі Алаштан асқан мәшһүр жырау, Қазақстанның еңбек сіңірген қайраткері Алмас Алматов алды.
«Қазақтың дәстүрлі әншілік, жыршылық, күйшілік өнері өркен жайып, ерекше дамыған өлкелердің бірі – қазақтың Батыс аймағы. Қазақтың батыс өлкесіндегі Атырауда күй өнері ерекше қанат жайды. Батыс күйшілік дәстүрінің көрнекті өкілдері Махамбет, Боғда, Құрманғазы, Дәулеткерей, Дина, Мәмен, Қазанғап туындыларын қазақ өнерінің ғана емес, бүкіл түркі әлемі музыкасының жетістігі деп айтуға болады.
Көне Түркі ескерткіштерінен, Қорқыт пен Асан қайғыдан бастап, Шалкиіз бен Қазтуған, Ақтамбердіге дейін жалғасып, ақыр аяғында Махамбет пен Сүйінбайға келіп тірелетін жыраулардың отты жырлары өткен тарихымыздың рухты сарынына толы. Сол сарынның бүгінгі жалғасы ретінде өзімнің жыр-бастауымды орындап, бүгінгі кештің шымылдығын ашуға рұқсат етіңіздер» деп «Жыр-бастауын» орындады.
Бұдан соң кезек төкпе күйге келді. Қазақстанның Мәдениет қайраткері Құттыгерей Дүйсеев «Терісқақпай» күйін орындап Арқа мен Жетісу, Батыс өңірлерінің дәстүрлі әншілері мен күйлеріне кезек берілді.
Жәкен Омаров, Шолпан Дәржанова, Ерлан Рысқали, Гүлмира Сарина, Манарбек Дәулетов, Батыржан Мықтыбаев, Қайрат Кәкімов, Ақнар Шәріпбаева, Шәрипа Жәменова, Жәнібек Жәмиевтер халықты екі сағат бойына ән-күй құшағында тербеді.
«Ұлы даланың көне сарындары» фестивалі Семей өңірінен бастау алып, Павлодар, Шымкент, Қарағанды, Петропавл, Қостанай, Орал, Ақтөбе қалаларында өтті. Бүгін Атырауда өтуде. Осы сапарларымызда не көрдік, нені байқадық? Тыңдарманның көкірегі ояу, көзі ашық көрерменнің ұлттық өнерге сусағанын көрдік. Бір өнерпаздың өзіне бес қайтара ән салдырғанын да көрдік. Кеш біткеннен кейін «Енді қашан келесіздер, неге жиі-жиі осылай келіп тұрмайсыздар?» деген көрерменнің ризашылығын да, назын да естідік. «Қалай болғанда да, дәстүрлі музыкамызды осылай дәріптесек, осылай құрметтесек, ел алдындағы, ұрпақ алдындағы бір борышымызды адал атқардық деп есептеймін», – деді жыршы Алмас Алматов.
Сайып келгенде, ұлттық, дәстүрлі музыканы насихаттап, ұрпақ санасында кодталуын мақсат еткен көшбасшы партияның ұстанымы халық тарапынан қошеметке ие.
Атырау облысы