Баян Рақышев 1985 жылдан бастап 1992 жылға дейін ҚазПТИ ректоры болып қызмет атқарды. Осы жылдары ҚазПТИ-де елімізде алғаш рет өндірістік тәжірибеден өту үшін мамандандырылған студенттік отрядтар ұйымдастырылды, кәсіпорындарда кафедраның бірнеше филиалы, ғылыми-зерттеу орталықтары ашылды. Сол кезде 38 мамандық бойынша 15 мыңға жуық студент оқыды. 1966-1978 жылдары тау жыныстарының қопарғыш заттармен жарылу саласындағы теориялық және эксперименттік зерттеулерді жалғастыра отырып, Баян Рақышұлы тау жыныстарының нақты массиві цилиндрлік зарядпен жарылудағы келісімді теориясын тапты. Теориялық механика мен серпімділік теориясының жалпы теоремаларын қолдана отырып, цилиндрлік пішінді жарылған қуыстың кеңею заңдылықтарын анықтады. Осы зерттеулердің нәтижелері бойынша Б. Рақышев 1978 жылы әлемге әйгілі ұлы ғалым, КСРО Ғылым академиясының академигі Владимир Ржевскийдің қолдауымен Мәскеу тау-кен институтында «Карьерлерде қопарылған массаның қажетті технологиялық параметрлеріне қол жеткізу үшін жарылыс процесін басқару» тақырыбында докторлық диссертациясын сәтті қорғады.
1981 жылы профессор ғылыми атағын иеленіп, 1983 жылы ҚазКСР Ғылым академиясының корреспондент-мүшесі болып сайланды. Осы жылдар ішінде Баян Рақышевтің жетекшілігімен тау жыныстарын өңдеудің жаңа физикалық әдістерінің проблемалық зертханасында соны тәсілдермен тау жыныстарын өңдеу саласында іргелі және қолданбалы зерттеулер жүргізілді. Орындалған зерттеулердің негізінде құрылыстық тау жыныстарының блоктарын жарылыссыз өндіретін, жартастардағы жарықшаларды ұңғылайтын және ерекше табиғи жағдайда бұрғылайтын машиналардың, техникалық құралдар мен прогрессивті технологиялары жасалды.
1994 жылдан қазіргі уақытқа дейін Б.Рақышев тау-кен ғылымдары саласындағы мемлекеттік ғылыми-техникалық бағдарламалар бойынша жобалардың ғылыми жетекшісі қызметін жалғастырып келеді. Академиктің басшылығымен 9 ғылым докторы, 30 техника ғылымдарының кандидаты, 9 PhD докторы, жүздеген магистр мен инженер дайындалды.
Баян Рақышұлы қазір де белсенді түрде ғылыми-зерттеу, ғылыми-ұйымдастыру жұмыстарын жүргізуде. Ғалым ағамыздың жиі айтатын мынадай сөзі бар: «Уақытын тиімді пайдаланбаған адам көп нәрсені жоғалтады». Осы ұстанымды ту еткен ол кісі саналы ғұмырында келешек ұрпақ игілігі үшін көп қызмет етті. Көрнекті ғалым, ұлағатты ұстазымыздың қазақ ғылымының дамуына қосқан зор еңбегі ұмытылмайды.
Ержан КӨЛДЕЕВ,
Қ.Сәтбаев атындағы
ҚазҰТЗУ проректоры