Атырау қаласының тұрғыны Нұрлан Отарбаев әкімдікке канистрмен келіп, өзіне бензин құйған.
Атырау әкімдігінде өзін өртемек болған азамат 51 мың теңге айыппұл төлейтін болды
Видеодан алынған кадр
1,011
оқылды

Оның шарасыз әрекетіне жер мәселесінің шешілмеуі себеп болған,  деп хабарлайды Aikyn.kz.

"Бағына орай, ер адам өзін-өзі өртеп үлгермей, оны әкімдік қызметкерлері тоқтатты",  делінеді «Ақ Жайық» басылымында.

Полиция шақырылды, қала әкімі Шәкір Содан да жүгіріп келді. Менің мәселем шешілетінін айтып, өзімді өртеудің қажеті жоқ деді. Олар бізге сабырмен үйге барып, жуынып, сағат 16.00-де әкімдікке келуді ұсынды. Мен осылай істедім,  деді Нұрлан Отарбаев.

Айтуынша, ол өзіне белгіленген уақытта қайта келген, кейбір тәртіп сақшылары оған жер учаскесі беріледі деп тағы да уәде берген. Сосын түсіндірме хат жазу үшін бөлімге баруын сұраған. Онда ол уақытша ұстау изоляторына қамалды.

Олар маған хаттама берді және мен оған қол қойғаннан кейін бірден кетіп қалуға  сендірді. Қол қойған кезде олар менің ұсталғанымды ресми түрде жариялап, уақытша ұстау изоляторына қамады. Келесі күні таңертең мені бұзақылық жасады деп айыптап, 51 мың теңге айыппұл салды, – дейді Нұрлан Отарбаев.

Ал полицейлердің хабарлауынша, бұл оқиға 1 ақпанда сағат 11.45-те болған.

«Атырау қаласының әкімдігіне азамат Н. Отарбаев келіп, бензин шашып, өзін өртеп жіберемін деп қорқытқан. Осылайша, ол жер мәселесінің шешілмей жатқанына наразылық білдірді. Осы себептермен азамат әкімшілік жауапкершілікке тартылды. Қазақстан Республикасының Әкімшілік құқықбұзушылық туралы кодексінің 434-бабы 1-бөлігімен оған «Ұсақ бұзақылық» бабы бойынша қылмыстық іс қозғалды»,  делінген БАҚ өкілдерінің сұрағына берілген жауапта.