Электронды жұмыс биржасында еліміз бойынша 21 509 бос орын бар екен. Оның 2 655-і Қарағанды облысына тиесілі. Қарағандылықтарға ұсынылған ең төменгі жалақы 70 мың теңгеден басталады.
– Биыл Өңірлік жұмыспен қамту картасы бекітілді, оған сәйкес 54 мың адамды жұмысқа орналастыруды жоспарлап отырмыз. Сәуір айындағы мәлімет бойынша 6 мыңға жуық адам жұмысқа орналасты. Ізденушілер сондай-ақ «Жастар практикасы», «Бірінші жұмыс орны», «Ұрпақтар келісімшарты», «Күміс жас» жобалары бойынша субсидияланатын жұмыс орындарына жолдама алмақ. Өңірдегі Saran индустриялық аймағында, Нұра және Бұқар жырау аудандарында және Теміртауда жаңа жұмыс орындары құрылады. Қысқа мерзімді курстарда 1 551 адам оқиды. Облыстың мыңнан астам тұрғыны Skills Enbek платформасы арқылы мамандық алмақ, – дейді басқарма басшысы.
Дегенмен еңбек нарығындағы жағдай мен басқарма басшысы мысал еткен статистиканың арасы жер мен көктей. Әсіресе, өңірдегі жеңіл өнеркәсіп секторында кадр тапшылығы байқалады. Бірнеше фабрикада тек жасы келген азаматтар жұмыс істейді. Жастардың бұл салаға қызығушылығы жоқ.
«Қазір осы жеңіл өнеркәсіпте жұмыс істейтін мамандарды ауыстыратын жас кадрлар даярланбайды. Мәселен, облыста 315 колледж бар. Осы колледждердің үштен екісі мемлекеттік аттестациядан өтпей қалған екен. Бұл дайындықтан өткен мамандардың жоғы, колледжде салалық мамандықтар бойынша берілетін білім сапасы төмен екенінен, түлектердің кәсіпорындармен байланысының жоғынан да көрінеді. Колледж бітірген түлектер жұмысқа ешбір кәсіптік бағдарсыз келеді. Кәсіпорындар мамандарды қайтадан оқытуға мәжбүр. Кадрдың біліксіздігінен еңбек өнімділігі де төмендей бастады. Кәсіпорындар зейнет жасына жақындап қалған кадрларды әрең ұстап отыр. Егер осы тенденция жалғаса берсе, кәсіпорынның дамуы мен жаңғыруына кедергі келетіні сөзсіз», – деді «Еско» компаниясының директоры Андрей Шмарин.
Білім басқармасының басшысы Гүлсім Қожахметова аймақта тігіншілерді даярлайтын 4 мемлекеттік және 2 жекеменшік оқу орны барын айтады. Бұл колледждерде 359 адам «тігінші» мамандығын меңгеруде. Кадрларды даярлауға 30 кәсіпорын қатысады», – дейді басқарма басшысы.
Қарағанды облысында жаңадан ашылып жатқан кәсіпорындар да жеткілікті. Әрі олар да жұмыс күшін қажетсінеді. Бір ғана Саран қаласында 1 500-ден астам бос жұмыс орны бар.
– Бос орындардың басым бөлігін жұмысшы мамандықтар алады. Тігіншілер, дәнекерлеушілер, газбен жұмыс істейтін қазандық жабдықтарының аппаратшысы, автобояушылар, вулканизаторлар, медициналық ұйымдағы бейінді мамандар мен пән мұғалімдері аса сұранысқа ие. Дөңгелек зауытына резеңке бұйымдар мен бөлшектерді пішуші, шиналарды жинаушы, құрастыру станоктарын қайта зарядтаушы, автоматика құралдары мен технологиялық жабдықтардың аспаптары бойынша электромеханик, электр жабдықтарын жөндеу және қызмет көрсету жөніндегі электромонтер және басқа да мамандар қажет, – деп атап өтті Марина Шегай.
Жұмыс бар, маман қаттығы басты мәселе болып тұрғаны рас. Ол үшін жасалып жатқан іс те аз емес. Тек ниет болса болғаны.
Әдебиет БЕЛГІБАЙҰЛЫ,
Қарағанды облысы