Қоғамның тұрақтылығы мен азаматтардың қауіпсіздігі заң үстемдігіне тікелей байланысты. Құқықбұзушылықтың азаюы – жай ғана статистикалық көрсеткіш емес, адамдардың күнделікті өміріндегі тыныштық пен сенімнің көрінісі.
Абай облысында 2026 жылдың алғашқы жартыжылдығының қорытындысы бойынша қылмыс деңгейінің төмендегені байқалады. Өңірде тіркелген қылмыстар саны өткен жылдың сәйкес кезеңімен салыстырғанда 355 дерекке азайған. Былтырғы жартыжылдықта 2 141 қылмыс тіркелсе, биыл бұл көрсеткіш 1 786-ны құрады. Бұл – құқық қорғау органдарының алдын алу жұмыстары, жедел қызметтердің үйлесімді әрекеті мен қоғамдық қауіпсіздікті қамтамасыз ету бағытындағы жүйелі шаралардың нәтижесі.
Мемлекет басшысы жариялаған «Заң және тәртіп» қағидаты бүгінде құқық қорғау саласының негізгі бағытына айналды. Бұл ұстанымның түпкі мақсаты – заң талаптарын сақтау мәдениетін қалыптастыру, азаматтардың құқықтарын қорғау және қауіпсіз орта құру.
Жақында Абай облысы Полиция департаментінде өткен жедел кеңесте өңірдегі құқықтық ахуал сараланып, алдағы кезеңнің міндеттері айқындалды. Департамент бастығы, полиция полковнигі Эльдар Данияровтың төрағалығымен өткен жиынға құрылымдық бөлімшелер мен аумақтық полиция бөлімдерінің басшылары қатысты. Кеңесте келтірілген мәліметтерге сәйкес, өңірде ауыр және аса ауыр қылмыстар саны азайған. Соның ішінде адам өлтіру деректерінің екі есеге қысқаруы профилактикалық жұмыстардың күшейгенін көрсетеді. Мүліктік қылмыстар бойынша да оң өзгеріс бар. Алаяқтық фактілері 815-тен 622-ге дейін төмендеген. Ұрлық деректерінің азаюы да тұрғындардың қауіпсіздігін қамтамасыз ету бағытындағы шаралардың тиімділігін аңғартады. Алайда құқық қорғау саласының нәтижесін тек қылмыс санының төмендеуімен бағалау жеткіліксіз. Маңызды көрсеткіштің бірі – жасалған қылмыстарды ашу сапасы.
Абай облысында негізгі бағыттар бойынша қылмыстарды ашу көрсеткіштері жақсарған. Бұл полиция қызметіндегі жеделдік, тергеу сапасы және бөлімшелер арасындағы өзара байланыстың артқанын білдіреді.
Қылмысты ашу – тек кінәліні анықтау емес. Ол қоғамдағы әділеттілік сезімін қалыптастырып, азаматтардың мемлекетке және құқық қорғау органдарына деген сенімін күшейтеді.
«Әрбір алды алынған қайғылы оқиғаның, әрбір ашылған қылмыстың және құтқарылған әрбір адамның артында полиция қызметкерлерінің күнделікті еңбегі жатыр. Бірақ кез келген көрсеткіштің ең басты бағасы – тұрғындардың өз қауіпсіздігін сезінуі және полицияға сенім артуы», – деді Абай облысы Полиция департаментінің бастығы Эльдар Данияров.
Бұл сөздің астарында құқық қорғау жүйесінің басты міндеті жатыр. Полицияның жұмысы тек қылмысты тіркеу немесе ашумен шектелмейді. Негізгі мақсат – құқықбұзушылықтың алдын алу, азаматтардың құқығын қорғау және қауіпсіз қоғам қалыптастыру. Кеңес барысында әлі де назар аударуды қажет ететін бағыттар талқыланды. Олардың қатарында бұрын жасалған ашылмаған қылмыстарды тергеу сапасын арттыру, профилактикалық жұмысты жетілдіру, атқарушылық тәртіпті күшейту және цифрлық технологияларды кеңінен пайдалану мәселелері бар.
Қазір технология құқық қорғау саласының маңызды құралына айналып отыр. Бейнебақылау жүйелері, заманауи аналитикалық платформалар мен цифрлық шешімдер полиция жұмысының тиімділігін арттырып, қылмыстың алдын алуға мүмкіндік береді.
Абай облысындағы жартыжылдық қорытынды құқық қорғау саласында оң үрдістер бар екенін көрсетті. Қылмыстың азаюы, ашылу көрсеткіштерінің жақсаруы және профилактикалық шаралардың күшеюі өңірдегі қауіпсіздік жүйесінің нығайып келе жатқанын аңғартады. Басты өлшем – сан емес, сенім. Өйткені қауіпсіз қоғамның негізі – заңға құрмет пен азаматтың өз мемлекетіне деген сенімі.
Э.Жүрсін