Бүгінде бұл орталық тек зейнеткерлердің бос уақытын тиімді ұйымдастыратын мекеме ғана емес, егде жастағы азаматтардың физикалық және рухани саулығын қолдайтын, олардың қоғамнан шет қалмай, белсенді өмір сүруіне мүмкіндік беретін әлеуметтік-сауықтыру алаңына айналды. Мұнда қарттарға жан-жақты қолдау көрсетіліп, олардың өмірге деген құлшынысын арттыруға ерекше көңіл бөлінеді. Қазір орталықтың қала аумағында орналасқан төрт бөлімшесінде күніне 800-ге жуық зейнеткерге тұрақты түрде қызмет көрсетіледі. Ал жыл басынан бері 3 200-ден астам адам қамтылып, 323 жаңа қатысушы тіркелген. Бұл орталыққа деген сенім мен сұраныстың жылдан-жылға артып келе жатқанын аңғартады.
Орталықта қариялар үшін 36 түрлі қызмет түрі ұйымдастырылған. Атап айтқанда, емдік денешынықтыру, массаж, фитобар, психолог қызметі, тұзды кабинет, шунгит терапиясы, бассейн, йога, хореография, еңбек терапиясы секілді сауықтыру бағытындағы жұмыстар тұрақты түрде жүргізіледі. Сонымен қатар бейнелеу өнері, қыш өнері, кітапхана, музыка, компьютерлік және қаржылық сауаттылық курстары, ағылшын және араб тілдерін оқыту сабақтары да зейнеткерлердің қызығушылығын арттырып отыр.
Әсіресе, егде жастағы азаматтардың шет тілдерін үйренуге деген ынтасы ерекше назар аудартады. Соңғы уақытта ағылшын тіліне қызығушылық айтарлықтай өсіп, бүгінде төрт бөлімшеде екі ауысым бойынша 180-ге жуық қызмет алушы шет тілін меңгеруде. Бұл – қазіргі заман талабына бейімделуге деген аға буынның талпынысын көрсететін жарқын мысал. Орталықтағы жұмыстар ғимарат ішінде ғана шектелмейді. Әр апта сайын зейнеткерлер Дендросаябақта серуендеп, түрлі мәдени-танымдық және сауықтыру іс-шараларына қатысады. Сонымен қатар Ж.Шанин атындағы академиялық драма театрына барып, тегін қойылымдарды тамашалау дәстүрге айналған. Мұндай шаралар олардың рухани әлемін байытып қана қоймай, қоғаммен байланысын нығайта түседі.
Белсенді ұзақ өмір орталығының медициналық-сауықтыру бағытындағы жұмыстары нақты нәтижесін беріп отыр. Мамандардың мәліметінше, орталық қызметін тұрақты пайдаланушылар арасында гипертония бойынша емделушілердің 93 пайызында, бронхитпен ауыратындардың 95 пайызында, артрит дертіне шалдыққандардың 68 пайызында оң өзгеріс байқалған. Ал артық салмақ мәселесі бойынша ем қабылдаған азаматтардың 82 пайызында денсаулық көрсеткіштері жақсарған. Бұл көрсеткіштер Шымкент қаласында қарттарға қолдау көрсету жүйесі жаңа деңгейге көтерілгенін айқын аңғартады. Мемлекет тарапынан көрсетіліп отырған әлеуметтік қамқорлықтың нақты нәтижесі ретінде Белсенді ұзақ өмір орталығы аға буынның денсаулығын нығайтып қана қоймай, олардың қоғам өміріне белсенді араласуына мүмкіндік беріп келеді.
Қазақ халқы қашанда қариясын қазына санаған. Сондықтан егде жастағы азаматтарға жағдай жасау – әлеуметтік міндет емес, ұлттық құндылықтарды дәріптеудің де маңызды көрінісі. Осы тұрғыдан алғанда, Шымкенттегі Белсенді ұзақ өмір орталығы – ұрпақтар сабақтастығын сақтап, қарттардың өмірге деген сенімін арттыратын тағылымды бастама. Қоғамның дамуы аға буынға көрсетілген құрметпен өлшенеді. Ал Шымкентте жүзеге асып жатқан мұндай игі жобалар қарияларға қамқорлық көрсетудің заманауи әрі тиімді моделін қалыптастырып отырғаны анық.
Назгүл НАЗАРБЕК,
Шымкент қаласы