Негізінен, заманауи талаптарға сай салынған аталмыш орталық балалардың демалысын тиімді ұйымдастыруға, өрендердің шығармашылық және интеллектуалдық танымын дамытуға арналған бірегей жоба саналады. Жыл он екі ай үздіксіз жұмыс істейтін сауықтыру орнында балғындардың жайлы демалысы мен сауықтырылуына барлық жағдай қарастырылған.
Қазір Қызылорда облысында 180 мыңға жуық мектеп оқушысы бар. Олардың жазғы демалысын мазмұнды әрі қауіпсіз ұйымдастыру бағытында өңірде жүйелі жұмыстар атқарылып келеді.
Облыс әкімдігінің мәліметіне сәйкес, биыл облыстағы 170 мыңнан астам оқушы түрлі тынығу лагерімен қамтылмақ. Ал 150 мыңға жуық бала мектеп жанындағы лагерьлерде демалады деп жоспарланған. Бұл тұрғыда өңірдегі 7 лагерь жазғы демалысқа шығатын балғындарды қабылдауға сақадай сай. Осы ретте жаңадан ашылған AI-KERIM оқу-сауықтыру орталығының маңызы ерекше.
Жаңа нысан қаладағы Президент саябағының көрікті аумағында орналасқан. Жалпы құны 10 млрд теңгені құрайтын орталықтың материалдық-техникалық базасы халықаралық стандарттарға толық сәйкес келеді. Қазір 300 орындық оқусауықтыру кешенінде 5 мың шаршы метрлік әкімшілік ғимарат, кең көлемді мәдени-көпшілік іс-шараларға арналған ивент-аймақ, төрт жатақхана, қонақүй үлгісіндегі арнайы ғимарат пен балалардың бос уақытын тиімді өткізуге арналған демалыс орындары қарастырылған.
Салтанатты рәсімде жиналған көпшілік алдында Қызылорда облысының әкімі Мұрат Ергешбаев жаңа нысанның маңыздылығына кеңінен тоқталды.
«Мемлекет басшысының қолдауымен балаларға арналған жыл бойы үздіксіз қызмет көрсететін оқу-сауықтыру орталығын ашып отырмыз. Бұл – жас ұрпақтың сапалы демалысына, шығармашылық дамуына жасалған үлкен мүмкіндік. Мұнда балалар тек тынығып қоймай, жаңа білім алып, интеллектуалдық әлеуетін арттыратын болады. Алдағы уақытта кешен аумағы толық абаттандырылып, көгалдандырылады, – деді Мұрат Нәлқожаұлы.
Салтанатты-шарада білім беру саласына елеулі үлес қосқан ұстаздар қауымы мен жаңа нысан құрылысын сапалы әрі уақытылы аяқтаған мердігер мекеме қызметкерлері облыс әкімінің алғысхатымен марапатталды.
Қазір AI-KERIM орталығының жанында заманауи ботаникалық бақ орналасқан. Бұл бақ балалардың табиғатқа деген сүйіспеншілігін арттырып, экологиялық мәдениетін қалыптастыруға бағытталып отыр.
Мәліметке сәйкес, мұнда Оңтүстік Африка, Қытай, Орталық және Оңтүстік Америка елдерінен әкелінген ерекше өсімдіктер өсіру көзделген. Мамандар мұндай сирек кездесетін өсімдіктер балалардың ғылыми-танымдық қызығушылығын арттырып, ботаника мен экология саласына деген ынтасын күшейтуге сеп болады деп отыр. Яғни, ботаникалық бақ тек демалыс аймағы емес, экологиялық білім беру алаңы ретінде де маңызды рөл атқарады.
Жалпы, Сырдың бас шаһарындағы серпінді жобалар қаланың сәулеттік келбетіне өзгеше өң беріп тұр. Бұл тұрғыда қаз-қатар тізілген жаңа нысандар халыққа қолайлы инфрақұрылым қалыптастырып қана қоймай, өңірдің экономикалық белсенділігін арттыруға негіз қалауда.
Осы орайда айта кеткен абзал, кейінгі жылдары Мемлекет басшысы мен Үкіметтің қолдауымен өңірде 200-ге жуық әлеуметтік нысан салынған. Бұл тұрғыда тек білім беру саласының өзінде 43 жаңа нысан ел игілігіне пайдалануға беріліпті. Атап айтсақ, «Келешек мектептері» ұлттық жобасы аясындағы 10 мектеп, физика-математика бағытындағы «Білім-инновация» лицей-интернаты, музыкалық колледждің жаңа оқу ғимараты мен жатақханасы, Оқушылар сарайы, «Сыр жұлдыздары» академиясы сұлу Сырдың сәулетін одан әрі арттыра түсті. Сонымен қатар облысқа қарасты Жалағаш, Жаңақорған және Шиелі аудандарында Оқушылар үйі мен өнер мектептері іске қосылып, ауыл балаларының шығармашылық мүмкіндігін кеңейтуге жол ашып отыр.
Ербақыт ЖАЛҒАСБАЙ,
Қызылорда облысы