Күн тәртібінде «ХАЛЫҚПЕН БІРГЕ!» сайлауалды бағдарламасы жол картасының «Медициналық көмектің қолжетімділігін арттыру» тармағы бойынша Ақтау қалалық емханаларының қызметі туралы мәселе қаралды.
Қалалық №1, №2 емхана басшылары Айгүл Кенжина және Жарас Байғожаев 2024-2025 жылдары атқарылған жұмыстар туралы баяндады. Партиялық бақылау комиссиясының мүшелері екі емхана қызметі туралы тұрғындардың әлеуметтік желілер мен ақпарат құралдарында жарияланған наразылықтарынан мысал келтіріп, емханалардың материалдық-техникалық базасы, күрделі жөндеу туралы сұрақтар қойды. Есепте тұрған науқастар тегін берілетін дәрілерді немесе жолдаманы уақытында ала алмауы, кезектің ұзақтығы туралы наразылық білдірген.
Облыстық денсаулық сақтау басқармасының бөлім басшысы Жанар Байманова есепте тұрған науқастарға арналған тегін дәрілердің ұлттық формуляр тізбесіне сәйкес берілетінін, тапшы дәрілердің облыстағы басқа емдеу орындарынан сұрау салып, алынатынын айтты.
Емхана басшылары мамандардың тұрақты болуы үшін үймен қамтамасыз ету, ғимараттарды күрделі жөндеу және құрал-жабдықтар алу бойынша ұсыныстар берілгендігін жеткізді.
Комиссия отырысына қатысқан «AMANAT» партиясы Маңғыстау облыстық филиалы атқарушы хатшысының орынбасары Анар Шамшадинова дәрігерлердің этика талаптарын сақтамауы туралы жарияланған мысалдарды келтіріп, науқастармен сыйластық қарым-қатынас орнату туралы ұсынысын айтты. Емханалардың басшылары ішкі аудит бөлімі науқастарды қолдау қызметін атқаратынын жеткізді. Науқастардың әрбір арыз-шағымы бойынша талдау жасалып, тиісті іс-шаралар жүргізілген. Жас мамандарға тәлімгерлер бекітілген, науқас пен дәрігер арасындағы қарым-қатынас мәдениеті туралы тәрбиелік іс-шаралар өткізіліп тұрады.
Сонымен қатар отырыста «AMANAT» партиясы орталық аппаратының сайлауалды бағдарламаның орындалысы жөніндегі хаттамалық тапсырмалары талқыланды. Жол картасы бойынша облыста салынып жатқан нысандардың құрылысы жоспар бойынша жүргізілуде. Партиялық бекеттер ашылған нысандардың құрылысы жергілікті мәслихат депутаттарының бақылауында тұр.
Елнар ЕЛТАЙ