Жиынға мемлекет және қоғам қайраткерлері, ғалымдар, алаштанушылар және мәдениет саласының өкілдері қатысты. Конференцияда Міржақып Дулатұлының ағартушылық және саяси-ағартушылық қызметі сөз болып, ғылыми баяндамалар таныстырылды.
Аталған басқосуды «AMANAT» партиясы, Денсаулық сақтау министрлігі, Педиатрия және балалар хирургиясы ғылыми орталығы және әл-Фараби атындағы Қазақ ұлттық университеті бірлесіп ұйымдастырып отыр. Денсаулық сақтау министрлігі Мемлекеттік тілді дамыту басқармасының басшысы Айжан Алдангорова бұл жиында білім беру мен денсаулық сақтау жүйесінің бірігуін «ғылымның барлық салаға ортақ болуымен» байланыстырды.
– Бүгінгі конференция қатысушылармен пікір алмасып, ғылыми зерттеулермен танысуға және бірлескен жобаларды талқылауға мүмкіндік береді. Ғылым – білім беру мен денсаулық сақтау саласы үшін ортақ бағыт. Сондықтан екі ведомство алдағы уақытта бірлескен жобаларды жүзеге асыруға ниетті. Мысалы, кеше біз Гүлсім Асфендиярованың 145 жылдығын атап өттік, ал бүгін Міржақып Дулатұлының 140 жылдығына орай екі ведомство әлеуметтік жобаларды бірігіп жүзеге асыруды жоспарлап отыр, – деді ол.
Айжан Әнуарбекқызы ғылыми зерттеулермен танысу үшін конференцияға еліміздің төрт өңірінен дәрігерлер келгенін атап өтті.
– Ғалымдар мен профессорлардың қатысуы арқылы денсаулық сақтау мен білім беру жүйесінің мамандары Міржақып Дулатұлының өмір жолымен, тарихи мұрасымен және білім беру саласындағы жетістіктерімен танысады. Сонымен бірге іс-шараға білім мен ғылым саласының өкілдері ғана емес, қоғамдық ұйымдар да қатысты. Өнер қайраткерлері, режиссерлер мен кинематографистер келешекте Алаш қайраткерлеріне байланысты фильмдер түсіріп, кітап басып шығаруды жүзеге асырады. Одан бөлек, терминология саласында да бірлескен жобаларды атқару көзделген, – деді А. Алдангорова.
Әл-Фараби атындағы ҚазҰУ оқытушысы Жасұлан Байғараев жиынның негізгі мақсаты Міржақып Дулатұлының ағартушылық, саяси және педагогикалық мұрасын терең зерттеуге, бүгінгі білім беру жүйесімен сабақтастығын талдауға бағытталғанын жеткізді.
– Міржақып Дулатұлы қазақ мектептерінің өз ана тілінде білім беруін, ұлттық тәрбие мен адамгершілік құндылықтарға негізделуін жақтады.
Ол алғашқы қазақ оқулықтарын жазуға, оқу бағдарламаларын жасауға атсалысты. Алаш қайраткерінің педагогикалық идеялары қазіргі «Жаңа гуманитарлық білім» мен ұлттық педагогика тұжырымдамаларымен үндес. Оның «Оян, қазақ!» еңбегі – тек әдеби шығарма емес, ұлтты тәрбиелеудің, ойландырудың манифесі болды, – деді Жасұлан Әбдімүтәліпұлы.
Іс-шара соңында «AMANAT» партиясының қолдауымен жастар арасында өткен «Қазақ үшін шам қылған жүрек майын» атты эссе байқауы мен «Ұлт руханиятының алтын тұғыры» атты постер байқауының жеңімпаздары марапатталды.
Алтынай БАУЫРЖАНҚЫЗЫ,
Алматы қаласы