Бұл бағыттағы стратегиялық жұмыстармен қатар арнайы әлеуметтік жобалар да кезең-кезеңімен жүзеге асырылып келеді. Мәселен, «AMANAT» партиясының сайлауалды бағдарламаларының Жол карталарында арнайы жобаларының бірі де дәл осы мүмкіндігі шектеулі жандарға қолдау көрсету, олардың қоғам өміріне белсене араласып өз орнын табуына, сондай-ақ жайлы өмір сүруіне мүмкіндіктер туғызу болып отыр.
Елорданың іргесіндегі Ақмола облысында да «AMANAT» партиясының 2023-2027 жылдарға арналған сайлауалды бағдарламалары бойынша Жол картасы шеңберінде ерекше қажеттіліктері бар мүмкіндігі шектеулі жандарға арналған әлеуметтік және көліктік инфрақұрылым нысандарын бейімдеу бойынша ауқымды шаралар жүзеге асырылуда. Партияның Ақмола облыстық филиалының мәліметінше, бұл шаралар инклюзивті орта қалыптастырып, әрбір азамат үшін тең мүмкіндік жасауға бағытталған.
Жалпы, Еңбек және халықты әлеуметтік қорғау министрлігінің мәліметінше, 2024 жылдың соңына дейін республика көлемінде 22 777 әлеуметтік нысан толықтай бейімделген. Бұл нысандардың қатарында денсаулық сақтау, білім беру, мәдениет және спорт мекемелерінің бар екенін атап өткен жөн. Мүмкіндігі шектеулі жандардың қоғам өміріне бейімделуіне арналған бұл нысандардың маңыздылығы да аса жоғары.
Ақмола облысында да аталған бағыт барынша қарқын алған. Партия филиалының дерегінше өңірде бүгінде дәл осы бағытта мақсатты жұмыстар қолға алынған. Ресми деректерге көз жүгіртсек, жалпы саны 1 037 нысан толықтай бейімдеуден өткізіліп, мүмкіндігі шектеулі азаматтардың еркін жүріп-тұруына жағдай жасалған.
Сондай-ақ «AMANAT» партиясының «Кедергісіз келешек» жобасы аясында Көкшетау қаласындағы әлеуметтік маңызы бар нысандарды қосымша бейімдеу бойынша партиялық бақылау да жүзеге асырылыпты.
Қалада барлығы 1 720 әлеуметтік нысан тіркелсе, соның ішінде 1 026 нысан, яғни 59,6 пайыз мүмкіндігі шектеулі жанға бейімделген. Биыл «Кедергісіз келешек» жобасы шеңберінде Көкшетауда 192 нысанды бейімдеу жоспарланған. Олардың ішінде білім беру, денсаулық сақтау, мемлекеттік басқару, мәдениет, спорт және әлеуметтік қорғау мекемелері бар. Қазір солардың 32-сі толық бейімделіп үлгерді, – дейді «AMANAT» партиясы Ақмола облыстық филиалы атқарушы хатшысының орынбасары Ақманат Әлімбетова.
Расында да, мемлекет пен қоғамның күш-жігерінің нәтижесінде ерекше қажеттіліктері бар азаматтарға қолайлы әрі қолжетімді орта қалыптасып келеді. Бұл – елдегі әлеуметтік әділеттілікті қамтамасыз етудің, сондай-ақ әр азаматқа өз әлеуетін жүзеге асыруға мүмкіндік берудің нақты көрінісі екені анық.
Абзал АЛПЫСБАЙҰЛЫ,
Ақмола облысы