Астана қаласында болған жол-көлік оқиғасына байланысты зардап шеккен баланың отбасына алғашқы күннен бастап жан-жақты көмек көрсетіп жатыр, – деп хабарлайды Аikyn.kz сайты.і Бұл туралы Астана әкімдігінің ресми сайты жариялады.
Әкімдік пен автобус парк өкілдері баланың ата-анасымен және туыстарымен кездесіп, қолдан келер көмегінен аянар емес.
Олар мынадай шаралар белгіледі:
- автобус паркі сақтандыру полисі есебінен 19,6 миллион теңге көлемінде сақтандыру төлемі (қазіргі заң аясында тиісті рәсімдер жүргізіліп жатыр);
- қосымша автобус паркі тарапынан 10 миллион теңге көлемінде демеушілік көмек көрсету туралы шешім қабылданды;
- отбасы Ақмола облысынан болғандықтан, емделу және оңалу кезеңінде уақытша баспана жалдау бойынша көмек ұсынылды;
- медициналық және психологиялық көмек көрсетіліп жатыр;
- әлеуметтік қолдау мәселелері бойынша сүйемелдеу қамтамасыз етілуде, – делінген хабарламады.
Қазір баланың жағдайы тұрақты, бейінді бөлімшеге ауыстырылған. Осы ұсынылған шаралар жайында зардап шеккен қыздың туыстары хабардар.
Ел ішінде үлкен резонанс тудырған жол-көлік оқиғасы 2 маусым күні болған. Автобус Республика даңғылында жол бойындағы бағанаға соғылған болатын. Жол-көлік оқиғасы кезінде 15 жолаушы зардап шегіп, үшеуі ауыр халде ауруханаға түсті. Қатты зардап шеккен 8 жастағы қыз екі аяғынан айырылған. Осы оқиға бойынша қылмыстық іс қозғалып, автобус жүргізушісі қамауға алынды. Кейін елорда әкімдігі көлік апаты туралы мәлімдеме жасады.
Қазір ауруханада жатқан екі науқасқа да жан-жақты көмек көрсетіліп жатыр. Олар да сақтандыру төлемін алады.