Меморандумға қол қою Қазақстан мен Гонконг жастары арасындағы әріптестікті дамытудың маңызды қадамы болды. Бұл құжат екі ел жастары арасындағы диалогты, мәдени байланыстарды және бірлескен бастамаларды дамытудың жаңа мүмкіндіктерін ашты. Құжат тараптардың жастар арасындағы өзара түсіністікті арттыруға және ынтымақтастықты кеңейтуге бағытталған.
Рәсім барысында жастар – елдің тұрақты даму жолындағы ең маңызды күш екені айтылды. Екі елдің ынтымақтастығын нығайтып, өзгерістерге жол ашатын да дәл осы жастар екені атап өтілді.Тараптар гуманитарлық, білім беру, мәдени және іскерлік бағыттардағы ынтымақтастық жастардың кәсіби дамуына ғана емес, сонымен қатар Қазақстан мен Қытай арасындағы өзара түсіністіктің артуына да ықпал ететініне сенім білдірді.
«Қол қойылған Меморандум аясында бірнеше бағытта ынтымақтастық көзделіп отыр. Оның аясында екі елдің жастары бір-бірінің мәдениетімен, дәстүрімен танысып, ұйымдарымыздың әлеуетін ашу, түрлі салада тәжірибе алмасу жоспарланған. Гонконг Жастар қауымдастығы «Жастар Рухының» тағы бір халықаралық серіктесіне айналды. Айта кетейік, «Жастар Рухы» Шанхай ынтымақтастық ұйымы мен Ислам ынтымақтастығы ұйымының Жастар кеңесіне ресми мүше болып табылады», – деді «Жастар Рухы» жастар қанатының төрағасы Ақерке Искандерова.
Меморандумға сәйкес, тараптар жастар саясатын дамытуға, ұлттық дәстүрлер мен құндылықтарды насихаттауға, кәсіпкерлік белсенділікті ынталандыруға, туризм мен цифрлық технологияларды ілгерілетуге бағытталған бірқатар бастаманы жүзеге асыруды жоспарлап отыр.
«Біз қазақстандық серіктестерімізбен ынтымақтастықтың келешегіне үлкен үмітпен қараймыз. Астана мен Гонконгты мыңдаған шақырым бөліп тұрғанымен, ашық диалог арқылы елдеріміздің жастары бір-біріне жақындай түсетіні анық. Бұл қарым-қатынас берік әрі ұзақмерзімді достыққа ұласатынына кәміл сенемін. Мен үшін Меморандумға қол қою – ең алдымен, жастар саясатын дамытуға қатысты көзқарас алмасудың мүмкіндігі. Мұндай байланыс мемлекеттеріміздің жас буынының ортақ ілгерілеуінің негізіне айналады деп сенемін», – деді рәсім барысында HKCPPCCYA төрағасы Уильям Шум.
«Жастар Рухының» бұл бастамасы Қытай Халық Республикасымен стратегиялық әріптестікті дамытуға бағытталған «AMANAT» партиясының жүйелі жұмысының жалғасы саналады. Еске салайық, былтыр ҚХР Төрағасы Си Цзиньпиннің Қазақстан Республикасына жасаған мемлекеттік сапары аясында «AMANAT» партиясы мен Қытай Коммунистік партиясы арасында өзара іс-қимыл және ынтымақтастық туралы меморандумға қол қойылған болатын. Аталған құжат партияаралық байланысты нығайтуға, елдер арасындағы достық әрі тату көршілік қарым-қатынасты дамытуға және жан-жақты стратегиялық әріптестікті кеңейтуге бағытталған.
Дайындаған Елнар ЕЛТАЙ