TED-алаңына шақырылған мектеп директорлары мен педагогтер өз тәжірибелерімен, қызықты оқиғалармен бөлісті. Іс-шара ашық ойталқы форматында өтіп, отандық білім беру саласын дамыту жолдары талқыланды.
Өз кезегінде, «AMANAT» партиясы Жамбыл облыстық филиалының төрағасы Дауыл Бейсенқұлов білім беру саласы әркез Мемлекет басшысының назарында екенін атап өтті. Сондай-ақ ол ұстаздар қауымының мәртебесін арттыру және білім беру саласындағы өзекті мәселелерді шешу – партияның негізгі бағыттарының бірі екенін жеткізді.
«Мұғалім Talks» – білім беру саласындағы жаңашыл көшбасшыларды, өз ісіне адал мұғалімдерді, қоғам өміріне оң өзгеріс алып келуге ниетті жанашыр жандарды тоғыстырып отыр. Мұғалім – мәртебелі мамандық. Сіздер ел ертеңін қалыптастырасыздар. Ал осындай еркін пікір алаңы – тәжірибе алмасуға, тың идеялармен бөлісуге, қанаттануға, шабыт алуға берілген зор мүмкіндік», – деді Дауыл Бейсенқұлов.
Осы орайда Жамбыл облыстық Білім басқармасының басшысы Нұрбек Оршыбеков «Мұғалім Talks» кейс-платформасы өңірдегі ұстаздар қауымының тәжірибесін арттыратын бірегей алаңға айналарына сенім білдіріп, алдағы уақытта бұл бастаманың ауқымын кеңейтуге дайын екенін жеткізді.
Айта кетейік, іс-шара аясында арнайы байқау ұйымдастырылып, оған барлығы 17 педагог қатысты. Олар 3 бағыт бойынша шығармашылық жұмыстарын ұсынып, тың идеяларымен бөлісті. Осылайша, эссе жазу, бейнежазба ұсыну және ойталқы кезеңдері бойынша үздіктер анықталды.
Бас жүлде Қордай ауданынан келген тарих пәнінің мұғалімі Әлішер Аяпбергенге бұйырды. Ал Тараз қаласындағы «Дарын» лицей-интернатының физика пәні мұғалімі Рауан Жаңабай 1-орын, А. Макаренко атындағы орта мектептің қазақ тілі мен әдебиеті пәнінің мұғалімі Салтанат Кусева 2-орын иеленді. Жүлделі 3-орын №39 мектеп-гимназиясының директоры Гүлнар Раптаеваға бұйырды.
Елнар ЕЛТАЙ