Мерекелік шара концерттік бағдарламалар, спорттық жарыстар, ойын-сауық бағдарламалары, флешмобтар және мәдени мұра көрмелерімен айшықталып, талантты жастардың ұлттық құндылықтарды ұлықтаған тамаша өнерімен ажарлана түсті. Салтанатты жиында университет басшысы Ерлан Сыдықов сөз сөйлеп, халықаралық деңгейде мойындалған оқу орнының ғылыми-білім беру орталығына айналған жетістіктері мен мүмкіндіктерін атап өтті.
– Біздің университет – бұл тек тарих пен дәстүр ғана емес, бұл – ғылым мен білімнің болашағын жасайтын адамдар. Біз әрбір студентімізбен, әрбір оқытушымызбен, әрбір түлегімізбен мақтанамыз, – деді ректор.
Университет аумағында өткен жәрмеңкеде қыш құмыралардан бастап антропологиялық жинақтар және шетелден келген студенттер ұсынған әр ұлттың мәдениетіне тән материалдық мұралар жиналғандардың көзайымына айналды. Қыш құмыра бұйымдар жасаумен айналысатын Диана Жалелқызы қыш өнері жайлы әңгімелеп берді.
– Еуразия университетінің өкілдерінің арқасында осы жәрмеңкеде керамикалық терапия туралы көбірек айтуға мүмкіндік алдық, Керамика терапиясы – стресстік күйден арылуға және психологиялық жағдайды жақсартуға бағытталған. Сондықтан бұл саламен кез келген жаста айналысуға болады, – деді ол.
Университет мерейтойы ән-күй, мың бұралған бимен шектеліп қана қоймай, марапаттар мен сыйлықтар жауған қуанышты сәттерімен де келушілерге қуаныш сыйлады. ENU Alumni Ambassador кездесуінде әр жылдардағы университет түлектері бас қосып, өзара емен-жарқын әңгімелесті. Сонымен қатар Eurasian Netherlands Business School білім бағдарламасы талқыланды. Бұған дейін ENU Alumni Ambassador – «Қазақстан Құрылысшылар Одағы» РҚБ президиум төрағасының орынбасары Серікжан Мергенбаев студенттер арасында бір жылдық грант және ақылы тәжірибе ұтысын жариялаған болатын. Мерейтойда ұтыс жеңімпаздары анықталып, бағалы сыйлықтармен марапатталды.
– Бұл жай ғана мереке емес, бұл университеттік бауырластық рухын қайта сезінуге мүмкіндік. Университетіміз тек Қазақстанда ғана емес, әлемдік деңгейде де үздік университеттердің қатарында екені белгілі. Демек, бұл оқу орнында Қазақстанның болашағы білім алуда. Білімді, талантты жастарды қолдау – жарқын болашаққа жол салу деп санаймын, деді оқу орнының түлегі Серікжан Мергенбаев.
Ақбота Мұқтар, ЕҰУ-дың 2 курс студенті