Шымкент қаласында «AMANAT» партиясының аудандық филиалының ұйымдастыруымен «Бақытты отбасы» партиялық жобасы аясында пәндік олимпиадаларда топ жарып, қаланың абыройын асқақтатқан оқушыларға арнайы құрмет көрсетілді.
Іс-шараға Қаратау аудандық филиалының төрағасы Бауыржан Кеңесұлы қатысып, әртүрлі мектептерден жиналған 20-ға жуық дарынды оқушыға өзінің алғыс хатын табыстап, бағалы сыйлықтар тарту етті. Марапаттау барысында ол білім бәйгесінде үздік шыққан оқушыларға сәттілік тілеп, олардың болашағына сенім білдірді.
«Бүгін біз тек үздіктерді ғана емес, болашақтың жарқын иелерін марапаттап отырмыз. Ел ертеңі – білімді ұрпақтың қолында. Сіздердің жетістіктеріңіз – тек өз мектептеріңіздің емес, тұтас қаламыздың мерейі. Алда да осындай жетістіктеріңіз көп болсын», – деді Бауыржан Кеңесұлы оқушыларға арнаған сөзінде.
Марапатталған оқушылар негізінен қазақ тілі, математика, информатика, химия пәндерінен жоғары нәтижелер көрсеткен. Солардың қатарында №72 жалпы орта мектебінің 7-сынып оқушысы Нығымет Құрбанбай да бар. Ол бұған дейін түрлі деңгейдегі жарыстарға қатысып, 10-нан астам марапатқа ие болған.
«Мен болашақта ұстаз болуды армандаймын. Қазір орыс және ағылшын тілдерін тереңдетіп үйреніп жүрмін. Сонымен қатар қолөнермен айналысып, нарыққа тың дүниелер шығарғым келеді. Бүгінгі марапат – болашаққа деген сенімімді нығайтты. Осындай құрмет көрсетіп жатқан аға-әпкелеріме алғысымды білдіремін», – деді ол өз әсерімен бөлісіп.
Іс-шара барысында бірқатар оқушылар өздерінің робототехника бағытындағы жаңа жобаларын таныстырды. Олар ауыл шаруашылығына арналған автоматтандырылған құрылғыларды ұсынып, бақша өнімдерінің өнімділігін арттыру және шығындарын азайту жолдарын көрсетіп берді. Бауыржан Кеңесұлы оқушылардың еңбегіне жоғары баға беріп, бұл жобалардың болашағы зор екенін атап өтті.
Айта кетейік, Шымкент қаласының оқушылары түрлі пәндік олимпиадаларда тұрақты түрде жоғары нәтиже көрсетіп келеді. «Бақытты отбасы» жобасы аясында алдағы уақытта да осындай дарынды шәкірттерді қолдау және марапаттау ісі жалғасын таппақ.
Елнар ЕЛТАЙ