Батыс Қазақстан облысы Денсаулық сақтау басқармасының басшысы Мадияр Өтешев 3 маусымнан бастап бір ай мерзімге қызметінен уақытша шеттетілді, – деп хабарлайды Aikyn.kz
– Мадияр Өтешев қарамағындағы ұйымдардың қызметіне тиісті деңгейде бақылау жүргізбегені үшін бір ай мерзімге лауазымдық міндеттерін атқарудан уақытша шеттетілді, – делінген облыс әкімдігінің баспасөз қызметінің хабарламасында.
Ведомство бұл шешімнің өңірдегі медициналық мекемелер басшыларының жаппай ұсталуымен байланысты екенін нақтылаған жоқ.
Дегенмен оқиға сәуір айының соңында Батыс Қазақстан облысында жеті медициналық мекеме басшысының ұсталуымен байланыстырылады. Олар ірі жеке медициналық зертханадан және басқа да өнім берушілерден "жалпы қамқорлығы" үшін жүйелі түрде пара алды деп күдіктелген.
Ұсталғандардың арасында мына тұлғалар бар екені хабарланды:
балалар ауруханасының бас дәрігері;
№ 1 және 6 емханалардың директорлары;
Жәнібек, Қаратөбе, Теректі және Дарьинск ауылдарындағы аудандық ауруханалардың бас дәрігерлері.
Тергеу мәліметінше, аталған медицина ұйымдарының басшылары бірнеше рет пара алды деген күдікке ілінген. Нұсқа бойынша, олар Қазақстандағы ірі жекеменшік медициналық зертханалардың бірінің өкілдерінен және басқа да қызмет жеткізушілерден «жалпы қамқорлық көрсеткені» үшін заңсыз сыйақы алып отырған.