Өңірде 10 жаңа мектеп салынды, 38 медициналық нысан пайдалануға берілді, 1,1 млн шаршы метр тұрғын үй тапсырылып, 9,5 мыңнан астам отбасы баспаналы болды. Сонымен қатар 1 300 шақырымнан астам жол жөнделіп, елді мекендер толықтай таза ауызсумен қамтамасыз етілді.
Жастарды қолдау бағытында 10 мыңнан астам адам жұмыспен қамтылып, мыңдаған азамат кәсіпкерлікті дамытуға қаржылай қолдау алды. Бұл – партия бағдарламасының өңірде нақты іске асып жатқанын көрсететін негізгі көрсеткіштер.
Аталған нәтижелер Өскеменде өткен «AMANAT» партиясы Шығыс Қазақстан облыстық филиалының кезектен тыс XXXVI конференциясында жан-жақты қаралды. Жиында сайлауалды бағдарламаның орындалу барысы ғана емес, оны жүзеге асырудағы жүйелі мәселелер мен тәуекелдер де талқыланды.
Атап айтқанда, бірқатар инвестициялық жобаның кешеуілдеуі, әлеуметтік нысандар құрылысы мерзімінің ауысуы және қаржылық шектеулерге байланысты кей бастамалардың кейінге қалуы сөз болды. Бұл мәселелер партия бақылауында болатыны бекітілді.
Конференция жұмысына партия Хатшысы Ержан Жылқыбаев, облыстық филиалдың Саяси кеңес, Бюро мүшелері, сыбайлас жемқорлыққа қарсы іс-қимыл кеңесі мен бақылау комиссияларының төрағалары, мәслихат депутаттары, қоғамдық ұйым өкілдері, сондай-ақ аудан, қалаларынан сайланған 175 делегат қатысты.
Ержан Жылқыбаев өз сөзінде Мемлекет басшысының «Халық үніне құлақ асатын мемлекет» тұжырымдамасы партия жұмысының өзегіне айналуға тиіс екенін атап өтті. Бұл дегеніміз – әр азаматтың мәселесі назардан тыс қалмауы керек. Ал партия сол мәселені нақты шешетін институт ретінде жұмыс істеуі қажет.
Жиында қарастырылған негізгі тақырыптың бірі – облыстық филиал төрағасын сайлау. Делегаттардың бірауыздан қолдауымен бұл қызметке Жанат Мекеева сайланды.
Өз сөзінде жаңа төраға филиал жұмысының негізгі басымдықтарын нақты белгіледі: қоғамдық қабылдаулардың тиімділігін арттыру, бастауыш ұйымдар жұмысын күшейту, партиялық жобаларды жүйелі дамыту және депутаттық корпуспен өзара іс-қимылды жандандыру.
– «AMANAT» – нақты істер партиясы. Әрбір бастама нақты нәтижемен дәлелденуге тиіс, – деді ол.
Конференция барысында Саяси кеңестің жаңа құрамы да бекітіліп, оның 55%-ы жаңартылды. Құрамға барлық аудан, қала өкілдері кіріп, әйелдер үлесі 36%-ды құрады. Сондай-ақ бақылау-тексеру комиссиясы қайта жасақталып, партия ішіндегі ашықтық пен есептілік тетіктері күшейтілді.
Бұл – партияның ішкі трансформациясының жалғасы. Өңірдің барлық аумағын қамтыған жаңа құрам, әйелдер үлесінің артуы – шешім қабылдау жүйесінің кеңейіп жатқанын көрсетеді.
Тілек ҚАБЫЛ