Талдықорғанда 32 жастағы Айзат Жұманованың өліміне қатысты қылмыстық іс бойынша апелляциялық сот шешім шығарды, – деп хабарлайды Aikyn.kz сайты.
Жетісу облыстық сотының алқасы бірінші инстанция тағайындаған 14 жылға бас бостандығынан айыру жазасын өзгеріссіз қалдырды.
Жәбірленуші тарап айыпты Қылмыстық кодекстің 99-бабы 2-бөлігі бойынша қайта саралауды сұраса, қорғаушы тарап жазаны жеңілдетіп, істі 106-бапқа ауыстыруды ұсынған. Бірақ сот апелляциялық сатыда іс тек тағылған айып шеңберінде қаралатынын атап өтті.
Сот алқасы іс материалдары 99-бап талаптарына толық сәйкес келеді деген қорытындыға келді. Осы бап бойынша 7 жылдан 15 жылға дейін жаза қарастырылған. Айыпталушының бұрын сотталмағаны ескерілгенімен, 14 жылдық жаза өзгеріссіз қалдырылды. Сондай-ақ моральдық өтемақы өндіру туралы шешім де күшінде қалды.
Қайғылы оқиға 2025 жылдың маусымында Жетісу облысы Ақсу ауданында болған. Марқұмның күйеуі Айбар Жанболат күдікті ретінде ұсталып, қамауға алынған.