Қызылордадағы Құрылтайдан жұртшылық көп жаңалық күтті. Ең бастысы, Конституцияға енетін өзгерістерді білгіміз келетінімізді жасыра алмаймыз, оның ішінде бір палаталы Парламент мәселесін әрине асыға күттік. 2022 жылғы Бүкілхалықтық референдумда Конституциямыздың 33-бабы жаңарды, оған дауыс бердік. Енді уақыт бір орында тұрмайды, әлемде геосаяси жағдай тұрақсыз, сондықтан елдің қарқындап дамып, тәуелсіздігімізге нұқсан келмей, нығая түсуі үшін заң шығарушы биліктегі депутаттарымыздың саяси жігерлігі, жан-жақты мықтылығы, біліктілігі, тәжірибелі болуы қажет екеніне көз жетті.
Ата Заңға енетін өзгерістердің ауқымы кеңдігін ескере отырып Мемлекет басшысы Конституциялық комиссия, Халықтық кеңес құру туралы Жарлық шығаратынын мәлімдеді. Мемлекет басшысы комиссия жұмысының қорытындысы бойынша бүкілхалықтық референдум өту уақытын белгілейтінін айтты.
Тиімді өзгерістер әр кезде дамудың кілті. Саяси жүйенің жаңғыруы, мемлекет мүддесін қорғайтын, халықтың қамын ойлайтын әділ билік, баршаға бірдей тең көзқарас қашанда тұрақтылықтың арқауы. Мемлекет басшысының Құрылтайда Конституциямызға әділетті Қазақстанды ең жоғары мақсат тұтып, оған жетуді енгізу туралы акцент беруі шынайы патриотизмнің көрінісі. Халық бағзы заманнан-ақ ащы да болса шындықты етіне жақын санайды.
Мемлекет басшысы сөзінің бірден-бір өзіме ой салған тұсы патриотизм мәселесі болды. Патриотизм туралы көп айтуға болады, оның тірелер тұсы, қане? Кешегі кеңес дәуірінде ұрандатқан жалаң патриотизм болды, оны бәріміз мойындаймыз. Ол кезде де отаншылдық, елжандылық, мәдени ортаға, туған жерге сүйіспеншілік терминдері болды, бірақ олар интернационализммен астарласып жатты, еңбек адамын қадірлеу де болды, еңбек адамдары Жоғары Кеңесте де отырды, бірақ одан пайда шамалы еді. Маманның аты маман, «шымшық сойса да, қасапшы сойсын» деген. Патриотизм бүгінде жаңа сипатқа ие болуда, адамгершілік, патриоттық сананы қалыптастыру, бойындағы ақыл мен білімді ел игілігіне жұмсау. Бүгінде патриотизм психологиялық саяси-әлеуметтік ортада қалыптасатын құбылыс – терең сана. Сондықтан өскен ортасы қандай екен деп сұрап жататыны қазақтың жайы емес. Әсіресе, жасанды интеллект дамыған дәуірде әрбір қазақстандықтың жүрек дүрсілінің Отан деп соғуы – алынбайтын қамал, көшпейтін бақ. Қазақстандық бірлік пен межелі тірліктің үндестік табуы – патриоттық иммунитеттің мықтылығында.
Ал Мемлекет басшысының Құрылтайда Парламентті «Құрылтай» деп атауды ұсынуы руханиятқа деген құрметтің биігі, елжандылықтың сұлтаны болды.
Қалыйма ЖАНТӨРЕЕВА,
«AMANAT» партиясы
Түркістан облыстық филиалы
Атқарушы хатшысының орынбасары