Іс-шара Астана қаласының прокуратурасы мен қала әкімдігінің «Заң және тәртіп» нарративі негізінде ұйымдастырылған. Акция мақсаты – қала халқының белсенділігін, құқықтық сауаттылығын арттыру, құқықтық мәселелерді шешуге көмектесу.
– «Құқықтық дәріхана» акциясы жыл бойы өтеді. Бұдан бұрын ойын-сауық орталықтарында әр жұма сайын ұйымдастырдық. Тұрғындардың мәселесін тыңдап, құқықтық көмек көрсетеміз. Қала халқы мемлекеттік органдардың қолдауымен денсаулық, білім беру, жұмыспен қамту, тұрғын үй алу, қала экологиясы, құрылыс-сәулет сынды түрлі саладан көмек алуына, шағым білдіруге, кеңес сұрауына болады, – дейді Астана қаласы прокурорының аға көмекшісі Айгерім Өмірзақова.
Халық көп жүретін орталықтарда акцияның жиі өтуі, расымен де, қуанышты жағдай. Қызығушылық танытқан мектеп оқушылары да, жас та, қария да осы маңнан табылды. Қала әкімінің орынбасары Есет Байкен акцияға арнайы қатысып, азаматтардың сан сауалын жекелей тыңдады. Бұл орайда зейнеткер Мұрат Спанқұлұлы дәрі-дәрмектің бағасы шарықтап тұрғанын жеткізді. Акцияда бұл мәселені қозғаған халықтың қарасы да мол.
– Дәрі бағасы бірнеше есе қымбаттаған. Мысалы, протезге жағатын «Корега» кремін бұрын 1 100 теңгеге алатынмын, ал қазір бағасы 3 есе өсті. Әкімдік министрлікке хат жазып, бірлесе жұмыс атқаратынын, кейін тұрғындарға хабар беретінін айтты, – дейді Мұрат Спанқұлұлы.
Акция алаңынан мемлекеттік органдармен қатар Отбасы банк кеңесшілерін де көзіміз шалды. Банк кеңесшісі Шынар Маратқызы үй алуға қатысты мүмкіндіктерді көбі білмейді дейді.
– Акция аясында мемлекеттік бағдарламалар арқылы үй алу жөнінде сұрайтын жұрттың қатары айтарлықтай көп. 2025 жылдан бастап атында баспанасы жоқ кез келген азамат Отбасы банктің сайты арқылы тұрғын үй кезегіне тұра алады. Кезекке тұрып, мемлекеттік бағдарлама арқылы баспана алуға мүмкіндіктер бар. Қазір «5-10-20», «Наурыз», «Наурыз жұмыскер» сынды бағдарламалар жөнінде кеңес беріп жатырмыз.
Кеңесшінің айтуынша, студенттер де мемлекеттік бағдарламаларға қатыса алады. Енді студенттер «Наурыз» бағдарламасына қатысуына болады, егер студент грантта оқыса, шәкіртақысы да табыс көзі ретінде қаралады.
Ал Білім басқармасы басшысының орынбасары Серік Әділбаевтың айтуынша, бүгінде елордадағы үш ауысымды мектептердің мәселесі реттелген. Қазір тұрғындардың көбін балабақша мәселесі ойландырып тұр.
Тұтынушылардың құқығын қорғау одағының төрағасы Еркін Қалиұлы да халықтың өтініш-тілегін арқалап, мәселені реттеуге келгенін жеткізді. Мәселе бірден реттеле қоймайтын сыңайлы, сол үшін әкім қабылдауына да жазылған.
– Әлеуметтік салада талқылайтын мәселе де, қояр сұрағым да көп. Әкімнің де қабылдауына жазылдым. Тұтынушылардың арызы көп, мысалы дүкен кассасы тауарға чек бермейді. Мұндайда тұтынушылар өз ауданына қарасты салық комитетіне арыз жазу керек екен. Кейбір тұтынушылар тауарды қайтара алмайды, ол кезде полиция шақыру керек, кейде полиция да келмейді. Негізінде, «Тұтынушылар заңы» бойынша көмек көрсетілу керек. Осы мәселелер жөнінде прокуратура мамандарымен сөйлестім, – дейді Е.Қалиұлы.
Мемлекеттік органдар екі сағатқа созылған акция аясында елорда жұртының қаншама арыз-шағымын тыңдап үлгерді. Мамандар қажет жағдайда жазбаша да өтініштерді қабылдап, өзекті мәселелердің тізімін жасады. Енді мәселелер ретімен шешімін тапса, нұр үстіне нұр болмақ. Акцияның бір артықшылығы, кеңес алуға алдын ала жазылудың керегі жоқ, бәрі қарапайым әрі тегін өтеді. Прокуратура елорда тұрғындары мен қонақтарын мүмкіндікті тиімді пайдалануға шақырады.
Айсұлу СЪЕЗХАН