Мемлекет басшысы Қасым-Жомарт Тоқаевтың «Жасыл экономика – елдің болашағына салынған инвестиция» деген ұстанымына сай, қалада қоршаған ортаны қорғау, көгалдандыру және қоғамдық кеңістіктерді абаттандыру бағытындағы жұмыстар жүйелі жолға қойылған.
Мәселен, Шымкенттің экологиялық және эстетикалық келбетін арттыру бағытындағы жұмыстардың бір жарқын көрінісі – «Көл» қоғамдық демалыс орнындағы заманауи әуенді-лазерлі субұрқақтың ашылуы. Қаланың жаңа символына айналған бұл нысан жарық, әуен және отты көріністерді біріктіретін ерекше кешенді құрылым болып табылады. Субұрқақтағы лазер сәулесі мен музыкалық ырғақ үйлесім тауып, түнгі уақытта көрерменге әсерлі көрініс сыйлайды. Барлық техникалық жүйелер тапсырыспен шетелде әзірленіп, монтаждау кезінде энергия үнемдеуші және автоматты басқару технологиялары қолданылған. Бұл шешімдер субұрқақтың жұмысын оңтайландырып, электр қуатын аз тұтынуға және күтіп-ұстау шығындарын төмендетуге мүмкіндік берді.
Шымкент қаласының әкімі Ғабит Сыздықбековтің айтуынша, мұндай заманауи нысандардың басты мақсаты – тұрғындарға сапалы демалыс мәдениетін ұсыну және әр ауданнан тартымды қоғамдық кеңістік қалыптастыру. «Біздің мақсатымыз – Шымкенттің әр ауданында тұрғындар мен қонақтар жиналатын заманауи серуен және демалыс орындарын көбейту. Мұндай нысандар шаһардың келбетін көркейтіп, адамдардың бос уақытын тиімді өткізуіне жағдай жасайды», – деді қала басшысы.
Субұрқақ кешені – тек инженерлік немесе көркем нысан емес, ол қаланың дамуы мен өркендеуінің символы. Маусым аяқталғанымен, нысан келесі жылы қайта іске қосылып, жаз мезгілінде қала тұрғындары мен қонақтарына ерекше әсер сыйламақ. Шымкент қаласы бүгінде жасыл экономика қағидаттарын іске асыруда аймақтық көшбасшылардың бірі саналады.
Қалада қалдықтарды сұрыптау жүйесі, энергия тиімді жобалар, жергілікті жасыл аймақтарды сақтау мен кеңейту бағдарламалары біртіндеп енгізілуде. Экологиялық бастамалар тек инфрақұрылымдық жобалармен шектелмейді. Қала тұрғындары арасында экологиялық мәдениет қалыптастыру, табиғатқа ұқыптылықпен қарау және жасыл өмір салтын насихаттау мақсатында түрлі акциялар мен ағаш отырғызу шаралары тұрақты түрде өткізіліп келеді.
Сонымен қатар Шымкент қаласында «Жасыл қала» бағдарламасы аясында соңғы жылдары жаппай ағаш отырғызу, гүлзарлар мен саябақтар салу, ескі демалыс орындарын жаңарту жұмыстары да қарқын алған. Биылғы жылы бұл бағытта айрықша белсенділік танытқан Абай ауданының әкімдігі бірнеше ауқымды жобаларды жүзеге асырып отыр. Жоспарға сәйкес, аудан аумағында 5 жаңа әмбебап демалыс орны (гүлзар) салынуда. Бұл нысандар тұрғындардың жайлы әрі экологиялық таза ортада тынығуына мүмкіндік береді. Атап айтқанда, жаңа гүлзарлар Достық шағынауданындағы Ақбосаға және Ақсу-Аюлы көшелерінде, Қызылжар шағынауданындағы Тоқбәйге көшесінде, Нұршуақ шағынауданындағы Миялы көшесінде және Асар-2 шағынауданындағы Нұр жол көшесінде бой көтеруде. Қазір кейбір нысандардың құрылысы аяқталып, тұрғындардың игілігіне берілді.
Бұдан бөлек, Асар шағынауданындағы тозығы жеткен 4 гүлзар қайта жаңартылып, заманауи демалыс аймақтарына айналуда. Аудан аумағында атқарылған жұмыстардың нәтижесінде 9 400 шаршы метр аумаққа көгал төселіп, 850 түп қарағаш пен 100 түп шырша көшеті отырғызылды. Бұл көрсеткіштер қаланың экологиялық ахуалын жақсартуға және жасыл белдеуді ұлғайтуға елеулі үлес қосады. Шымкент қаласының әкімдігі мен жергілікті құрылымдар ағаш отырғызу мәдениетін арттыруға, жергілікті тұрғындарды табиғатты қорғау ісіне тартуға, жасыл желек санын көбейтуге ерекше назар аударып отыр. Мәселен, былтыр қала аумағында 500 мыңнан астам ағаш пен бұта түрлері отырғызылған болатын.
Айта кетейік, Шымкент – жасыл экономика қағидаттарын жүйелі жүзеге асырып келе жатқан экологиялық қала. Абай ауданындағы атқарылып жатқан жұмыстардың өзі – Шымкенттің «Таза қала» болуға деген нақты қадамы.
Мегаполис үшін экологиялық тепе-теңдік – стратегиялық маңызы бар бағыт. Сондықтан көгалдандыру тек қаланың келбетін жақсартып қана қоймай, жергілікті тұрғындардың өмір сапасын арттыруға, жылыжай әсерін азайтуға және шаң-тозаң мен көмірқышқыл газының деңгейін төмендетуге ықпал етеді. Көгалданған қала – таза ауа, жайлы өмір және салауатты қоғам кепілі.
Назгүл НАЗАРБЕК,
Шымкент қаласы