Бұл жиын қазіргі қоғамдағы әйелдің рөлі мен жауапкершілігі, отбасы құндылығы, баланың дамуы мен тәрбиесі секілді маңызды тақырыптарды қамтыды. Іс-шараға мемлекеттік орган өкілдері, ғалымдар, депутаттар, медицина және білім саласының мамандары, азаматтық қоғам мүшелері қатысты.
Жиынды «AMANAT» партиясы Шымкент қалалық филиалы атқарушы хатшысының орынбасары Ербол Байқонысов ашып, Мемлекет басшысы Қасым-Жомарт Тоқаевтың әйелдердің құқықтарын қорғау мен қоғамдағы белсенділігін арттыру бағытындағы саясатына тоқталды. Оның айтуынша, бүгінде «AMANAT» партиясы қатарындағы әйелдердің үлесі 65 пайыздан асады, ал бастауыш ұйымдардың жартысынан көбін әйелдер басқарады. Бұл көрсеткіш нәзікжандардың ел өміріндегі орнын айқындайды. Партияның «Әйел аманаты» жобасы әйелдерді қолдау, олардың әлеуетін арттыру және әр салада көшбасшы болуына мүмкіндік беретін диалог алаңы ретінде маңызды рөл атқарып келеді.
Басқосуда әйелдер қанатының жетекшісі Наргиза Керимбаева өңірде атқарылып жатқан жұмыстарды баяндап, қоғамда әйел көшбасшылығын дамыту бағытындағы нақты нәтижелерге тоқталды. Президент жанындағы мемлекеттік басқару академиясының доценті, саясаттанушы Сәуле Рысбаева «Гендерлік теңгерім және теңдік» тақырыбында сөз сөйлеп, еліміздегі әйелдердің мемлекеттік басқарудағы үлесі артып келе жатқанын атап өтті. Ал қалалық мәслихат депутаты, профессор Дария Қожамжарова «Ғылымдағы әйелдердің рөлі» жөнінде баяндама жасап, әйелдердің білім мен ғылым саласындағы табандылығы мен еңбегі ел дамуының қозғаушы күші екенін айтты.
Әйелдердің әлеуметтік белсенділігі мен гендерлік теңдік тақырыбы отбасылық құндылықтармен тығыз байланысты. Осы мақсатта «AMANAT» партиясы Шымкент қалалық филиалының әйелдер қанаты ұйымдастырған «Спорт арқылы бала тәрбиесі: тәртіп, жігер, құрмет» және «Бала гигиенасы – денсаулық кепілі» атты кездесулерде аналар мен мамандар баланың жан-жақты дамуына қатысты пікір алмасты. Кездесуде сөз алған Наргиза Керимбаева бала бойындағы тәртіп пен төзімділік ертеңгі азаматтық ұстанымның бастауы, спорт тек денешынықтыру емес, ол ерік-жігер мен мінездің мектебі екенін атап өтті. Қазақстан гимнастика федерациясының президенті, қалалық мәслихат депутаты Әлия Юсупова спорттың бала психологиясына оң әсер ететінін жеткізді. – Бала спортпен айналысқанда өзін жеңуге, мақсат қоюға және нәтижеге жетуге үйренеді. Бұл қасиеттер оны өмір бойы жетістікке жетелейтін негіз болады, – деді ол.
Ал дәрігер Дария Төкқұлыева бала гигиенасы мен аурулардың алдын алу мәселесін көтеріп, денсаулықтың бастауы тазалықта, қарапайым гигиеналық дағдыларды балаға ерте жастан үйрету ата-ананың басты міндеті екенін жеткізді. Кеңес отырысында сөз алған сарапшылар мен қоғам белсенділері әйелдердің саяси, әлеуметтік және отбасылық өмірдегі белсенділігі мықты қоғам мен тұрақты мемлекеттің кепілі екенін атап өтті. Гендерлік теңдік ұғымы – тек әйелдердің құқықтары емес, ол жұмылған қоғамның бірлігі мен әділдігі, ұрпақ тәрбиесі мен отбасылық мәдениеттің негізі.
Осындай бастамалар арқылы Шымкент қаласында әйелдердің әлеуетін ашу, отбасылық институтты нығайту және балалардың тәрбиесі мен денсаулығын қорғау бағытындағы жұмыстар жаңа қарқын алып отыр. Қоғамның даму деңгейі әйелдің әлеуетіне, ананың беделіне және баланың тәрбиесіне тікелей байланысты. Отбасы берекесі – ел болашағының кепілі.
Назгүл НАЗАРБЕК,
Шымкент қаласы