Нәзікжандылардың қоғамдағы қызметі, отбасындағы рөлі, аналық мейірімі, ер азаматпен иықтаса дамуы әрқашан өзекті. Сондай-ақ әйелдер қауымының еліміздегі саяси үдерістерге белсене қатысуы да маңызды.
Таяуда «AMANAT» партиясы ұйымдастырған Tomiris басқосуы қоғамдық және саяси өмірде әйелдердің белсенді болуын мақсат етеді. Соның арқасында Қазақстан әйелдері қоғамдағы өз орнын тауып, саясатта, кәсіпкерлікте, өнерде, отбасында алға озып келеді.
Қазақ қоғамында әу-бастан әйелдің орны айрықша. Халық даналығында «қыздың орны төр», «әйел бір қолымен бесікті тербесе, екінші қолымен әлемді тербейді» деп текке айтылмаған. Көнеден бастау алатын дүниетаным бүгінгі замануи қоғаммен үйлесім тапқан. Сақ патшалығын қорғаған Тұмар патшайым, айналасына аналық мейірімін шашқан Домалақ ана, берісі Екінші дүниежүзілік соғыста көзсіз ерлік көрсеткен Әлия мен Мәншүк, Хиуаз Доспанова апаларымыздың істеген ісі, ерлігі көпке мәлім, есімдері тарихта алтын әріппен бедерленді.
Сондықтан Tomiris секілді жобалардың ел үшін мән-маңызы жоғары болмақ. Осы тұста отбасы құндылығы, әйел адамының белсенділігі, қоғамдық қызметі турасында Мәжіліс депутаты Үнзила Шапақтың ойын білдік.
– «AMANAT» партиясының Tomiris әйелдер көшбасшылығын дамыту жобасының IV легіне ұласты. Өзім осы жобаға 2023 жылдан қатынасамын. Бұл жобаға іріктеу нәтижесінде 40 адам өтеді. Осындай игі бастамалардың арқасында әйелдердің әлеуеті жоғарылап келеді. Биылғы ерекшелік 60 адамға көбейді. Бітіруші білімгерлер қатарынан да нәзікжандылар алынды. Бұл егер қыз-келіншектердің саяси қызығушылығы, дағдысы болса, соны жүйелеп, арнаға салып қойып береді. Соның арқасында мансаптық саты қалыптасып, қоғамдық белсенділік артады, – деді мәжілісмен.
Осының бәрі Қазақстанда гендрлік теңдік аса мән берілетінін көрсетеді. Кейінгі жылдары әйелдердің қоғамдағы белсенділігі, еңбекке араласуы, отбасы, ошақ қасында қалып қоймауы назардан тыс қалған емес. Сол себепті әйелдер қоғам өмірімен қатар, бала тәрбиесін де назардан тыс қалдырмауы керек екенін Батыс Қазақстан облысының Киім дизайнерлер қауымдастығы төрайымы Әсем Сырымова айтты.
– «AMANAT» партиясы қоғамдағы белсенді әйелдерді үнемі қолдайды. Соның арқасында әр кәсіпкер, әр белсенді өзінің орнын тауып, біліктілігін жетілдіріп келеді. Әрбір іске белсенділік таныту үшін адамға білім керек. Біздер білімді осындай басқосуларда тәжірибе алмасу арқасында қол жеткіземіз. Өзі дамып, белсенділігі артқан, кәсіп игеріп, өзін жетілдірген әйел отбасында бірге алып жүре алады, – деді белсенді.
Айта кетейік, жоба «AMANAT» партиясының Әйелдер қанаты мен Саяси менеджмент академиясының ұйымдастыруымен, Президент жанындағы Әйелдер істері және отбасылық-демографиялық саясат жөніндегі ұлттық комиссия және Конрад Аденауэр қорының қолдауымен жүзеге асты. Биыл жоба дәріс алып, тәжірибесі артқандардың саны 172 адамды құрады. Tomiris – елдегі көшбасшылыққа үйрететін бірегей бастама. Мақсаты – тек саяси-қоғамдық белсенділік емес, отбасы құндылығы, ұлттық салт-сананы да дәріптеу. Сонда ғана төрт аяғын тең басқан, үйлесімді платформа қоғамда өз нәтижесін беретін көрінеді.
Олжас ЖОЛДЫБАЙ