Сенат Төрағасы Мәулен Әшімбаев биыл Тәуелсіздікке жол ашқан және мемлекеттік құрылымның маңызды қағидаттарын бекіткен тарихи құжат – Егемендік туралы декларацияның қабылданғанына 35 жыл толып отырғанын айтып, Республика күнінің маңызына назар аударды.
«Биыл Егемендік туралы декларацияның қабылданғанына 35 жыл толып отыр. Бұл құжат еліміздің дербес мемлекет ретіндегі саяси және құқықтық негізін бекітті. Қазақстан өзін территориясы бөлінбейтін біртұтас мемлекет ретінде жариялады. Сондықтан Республика күні айрықша тарихи маңызға ие. Ұлттық мерекеміз – егемендігіміздің нышаны және ғасырлармен өлшенетін мемлекеттілігіміздің қайта жандануының жарқын көрінісі. Бүгінде бұл күн жаңа мазмұнмен толығып, ұлттық бірегейлікті нығайта түсетін мерекеге айналды», – деді Мәулен Әшімбаев.
Сонымен қатар Сенат Төрағасы Мемлекет басшысы Жолдауда белгілеп берген реформаларды сапалы іске асырудың маңызды екенін айтып, палатаның осы бағыттағы жұмыс бағдарына тоқталып өтті.
«Президентіміз Қасым-Жомарт Кемелұлы Тоқаев биылғы Жолдауында цифрлық күн тәртібін ілгерілетуге және жасанды интеллектіні кеңінен қолдануға баса мән берді. Басты мақсат – жаңа технологиялар арқылы азаматтардың әл-ауқатын арттыру, олардың өмір сүру сапасын жақсарту және елдің бәсекеге қабілеттілігін нығайту. Бұл Әділетті Қазақстан құру жолындағы стратегиялық бағдардың логикалық жалғасы екені сөзсіз. Олардың сапалы әрі уақытылы орындалуын заңнамалық тұрғыдан қамтамасыз ету жолында Парламент Сенаты белсенді қызметін әрі қарай да жалғастыра береді», – деп, Мәулен Әшімбаев әріптестерін Республика күнімен құттықтады.
Сондай-ақ Сенат Төрағасы Мемлекет басшысының тапсырмасымен бірқатар сенатор мен Аппарат қызметкерлеріне мемлекеттік наградаларды салтанатты түрде тапсырды. Нақты айтқанда, Мемлекет басшысының Жарлығымен сенаторлар Сүйіндік Алдашев, Жанна Асанова және Алтынбек Нухұлы «Парасат» орденімен марапатталды. Сенат депутаты Нұрлан Бекенов пен Сенат Аппаратының бас консультанты Серік Қаражан – «Құрмет» орденімен, Сенат Аппаратының бөлім басшылары Алмас Данияров пен Елдос Сайлаухан және Сенат Аппаратының сектор меңгерушілері Зәуре Уашова мен Раушан Базарова «Ерен еңбегі үшін» медалімен наградталды. Сонымен қатар бірнеше депутатқа халықаралық парламентаралық ұйымдардың марапаттары табысталды.