Sora 2 ғажайып видеолар жасайды

Aikyn.kz жаңа құралдың ерекшеліктері мен оны қолдануда туындаған даулардың себебін BBC News материалына сүйеніп түсіндіреді.

АҚШ-тағы Apple App Store-да көш бастаған бұл қосымша қарапайым мәтіндік нұсқаулардан ұзақтығы 10 секундтық реалистік видеолар жасайды. Sora жобасының жетекшісі Билл Пиблз (Bill Peebles) X (бұрынғы Twitter) платформасында таңғаларлық өсу Солтүстік Америкамен шектелген аудиторияның ғана көрсеткіші екенін жазды.

Алайда танымалдықтың өсуімен бірге OpenAI-дің авторлық құқықпен қорғалған материалдар мен дүниеден өткен танымал тұлғалардың бейнелерін пайдалану тәсілі интернетте сынға ұшырады.

Sora 2 пайдаланушыларға өздері жасаған видеороликтерді әлеуметтік желілерде оңай жариялауға мүмкіндік береді. Бұл функция интернетті түрлі бейнелерге толтырып жіберді. Олардың кейбірінде Майкл Джексон мен Тупак Шакур сияқты өмірден қайтқан жұлдыздардың бейнелері қолданылған. Актер әрі комик Робин Уильямстың қызы Зельда Уильямс көпшіліктен әкесінің бейнесі бар ЖИ-видеоларды өзіне жіберуді тоқтатуды сұрады.

OpenAI өкілі Axios жаңалық сайтына берген түсініктемесінде тарихи тұлғалардың бейнелерін қолдануға «сөз бостандығына» байланысты рұқсат етілгенін айтқан. Дегенмен компания «жақында қайтыс болған» танымал тұлғалардың бейнелерін алып тастауға олардың туыстары немесе заңды өкілдері өтініш бере алатынын мәлімдеді. Бірақ «жақында» ұғымының нақты мерзімі көрсетілмеген.

Көптеген Sora видеоларында фильмдер мен ойындардың кейіпкерлері де бар. CNBC-дің хабарлауынша, Sora-ның бір deepfake-видеосында OpenAI басшысы Сэм Альтман Pokémon кейіпкерлерімен бірге бейнеленіп, әзілдеп: «Nintendo бізді сотқа бермесе екен», – дейді. Тағы бір вирусқа айналған видео-роликте ол Пикачуды қуырып, жеп қояды.

Nintendo бұл жағдайға қатысты сотқа шағым түсіру жоспары бар-жоғын ашық айтпаған. Бірақ OpenAI-мен қатар бірнеше ірі ЖИ компаниялары шығармашылық құқық иелерімен сот дауларына тартылып отыр.

Мұндай істердің бағасы да жоғары. Мысалы, Anthropic компаниясы авторлардың еңбегін заңсыз пайдаланды деген айыппен 1,5 миллиард доллар өтемақы төлеуге келісім берген.

OpenAI бұл мәселелерге қатысты өз тәсілін қайта қарастырып жатқанын ғана мәлімдеген. 4 қазанда компания басшысы Сэм Альтман өзінің блогында:

«Біз адамдардың Sora-ны қалай қолданатынын тез үйреніп, пайдаланушылар мен құқық иелерінің пікірлерін ескеріп жатырмыз», – деп жазды.

Оның айтуынша, алдағы уақытта OpenAI құқық иелеріне кейіпкерлердің жасалуын бақылауға көбірек мүмкіндік беруді және табысты бөлу жүйесін енгізуді жоспарлап отыр.

Құқық иелері Sora видеоларын «интерактивті фанфик» деп қабылдай ма, әлде компанияны азаматтық сот істері күтіп тұр ма? Бұл сұрақ ашық күйінде қалуда.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.