Әзербайжанның Гянджа қаласында жүзуден III ТМД елдері ойындарының соңғы жүлделері сарапқа салынды, – деп хабарлайды Aikyn.kz.
Біздің команданың спортшылары 4 дисциплинада сынға түсіп, соның ішінде 2 күміс, 1 қола медаль иеленді.
Жүлдегерлер:
Тайисия Короткова (кешенді жүзу, 400 м) - күміс
Қазақстан ұлдар құрамасы (кешенді жүзу, 4х100 м) - күміс
Қазақстан құрамасы, микст (кешенді жүзу, 4х100 м) - қола медаль.
Гянджа қаласында жүзуден 5 күнге созылған жарыста Қазақстан құрамасы барлығы 9 күміс және 10 қола жүлде жеңіп алды. Айта кетейік, команда сапындағы көшбасшының бірі Тайисия Короткова жоғары даярлығын көрсетіп, жекелей және командалық сынды қосқанда 9 жүлдеге қол жеткізді.
Кешенді жарыс Әзербайжанның Гянджа, Евлах, Мингячевир, Габала, Шеки, Гейгёль мен Ханкенді секілді 7 қаласында қатар өтіп жатыр. Биыл додаға 13 елден барлығы 1 600-ден астам спортшы жиналды. Олар 23 дисциплинада өзара жүлдеге таласып жатыр. III ТМД елдері ойындары 8 қазанда мәресіне жетеді.
Қазір Қазақстан 2 алтын, 13 күміс және 24 қола медальмен жалпыкомандалық есепте 5-орында тұр.