Атырауда өткен Ұлттық құрылтайдың ІІІ отырысында Мемлекет басшысы Қасым-Жомарт Тоқаев «Озық ойлы ұлт болудың ең төте жолы – кітап оқу» деп атап өткен болатын. Осы үндеуді қолдау мақсатында Мәжіліс Спикері, «AMANAT» партиясының Төрағасы Ерлан Қошанов «Кітап оқитын ұлт» атты республикалық жобаның ресми басталғанын жариялады.Жобаны қолдаған алғашқы өңірлер қатарына Қарағанды, Қостанай облыстары және Шымкент қаласы енді.
– Шымкент – тек республикалық маңызы бар мегаполис қана емес, ол – тарихы терең, мәдениеті бай, білім саласының дәстүрі қалыптасқан шаһар. Сондықтан дәл осындай маңызы зор жобаның біздің қалада жүзеге асуы заңдылық, – деді қала әкімі Ғабит Сыздықбеков.
Жобаға мектеп оқушылары, колледж және жоғары оқу орны студенттері, ұстаздар, отбасылық әулеттер мен мемлекеттік қызметкерлер қатысады. Қатысушылар «Кітап оқитын мектеп», «Кітап оқитын колледж», «Кітап оқитын университет», «Кітап оқитын педагог», «Кітап оқитын әулет» және «Кітап оқитын мемлекеттік қызметкер» номинациялары бойынша бақ сынайды.
Барлық қатысушыға ортақ талап – жауапты министрліктер мен сарапшылар іріктеген 15 кітапты оқу. Мәселен, 6-10-сынып оқушылары үшін әр сыныпқа бөлек 15 кітаптан, жалпы 75 туынды ұсынылған. Бұл тізімге «100 кітап» жалпыұлттық сауалнамасында таңдалған шығармалар да енген. Жалпы алғанда, қазақ тілінде 150, орыс тілінде 150 кітап қарастырылған.
Партия байқауының жеңімпаздары қомақты қаржылай сыйлыққа ие болады. Пилоттық жоба аясында үш аймақта 100 мыңнан астам адам қамтылмақ. Ал келесі жылдан бастап жоба еліміздің барлық өңірінде жүзеге асырылады.
Жобаны «AMANAT» партиясы мен «Кітап оқитын ұлт – Читающая нация» қоғамдық қоры бірлесіп ұйымдастыруда. Бас демеушісі – ALAGEUM ELECTRIC компаниясы.
– Кітап – білім мен шабыттың сарқылмас қайнары. Ол көкжиегіңді кеңейтеді, тұлғаңды қалыптастырады, жаңа мүмкіндіктерге жол ашады. Кітапқа деген сүйіспеншілік – бәрімізге ортақ жақсы дәстүрге айналсын! – деді қала әкімі.
Бұл бастама тек байқау немесе жоба ғана емес, ұлт болашағына бағытталған үлкен қадам. Кітап оқуға қызығушылықты арттыру арқылы ой-өріс кеңейіп, білімге құштар жас буын қалыптасады. Шымкенттен бастау алған «Кітап оқитын ұлт» жобасы ел көлемінде кеңінен қолдау тауып, қоғамда оқырмандық мәдениетті жаңа деңгейге көтеретіні сөзсіз.
Әсет ҚАЛИ