Нысанның ашылу рәсіміне Батыс Қазақстан облыстық Денсаулық сақтау басқармасының басшысы Мадияр Утешов, «AMANAT» партиясы облыстық филиалы атқарушы хатшысының орынбасары Афиза Семғалиева, Жаңақала ауданының әкімі Алпамыс Көшкінбаев, медицина саласының ардагерлері, мекеме басшылары және ауыл тұрғындары қатысты.
«Біздің өңірде 50 медициналық нысан салу жоспарланған болатын. Бүгінде оның 49-ы пайдалануға берілді. Бұл ауыл халқының денсаулығын нығайтуға, аурулардың ерте кезеңде анықталуына, сондай-ақ балалардың, жүкті әйелдер мен қарт кісілердің сапалы медициналық көмек алуына үлкен септігін тигізеді деп сенеміз», – деді облыстық Денсаулық сақтау басқармасының басшысы Мадияр Утешов.
Жаңа бір қабатты ғимарат заманауи құрал-жабдықтармен толық қамтамасыз етілген. Онда қабылдау бөлмесі, физиотерапия кабинеті, фельдшер бөлмесі, залалсыздандыру, екпе салу және ем-шара бөлмелері қарастырылған.
Бұл медициналық пункттің ашылуы – ауыл тұрғындарына көрсетілетін медициналық көмектің сапасы мен қолжетімділігін арттыруға бағытталған маңызды қадам. Енді ауыл халқы алысқа бармай-ақ заманауи әрі қолайлы жағдайда медициналық қызмет ала алады.
Елнар ЕЛТАЙ