Бұл жолғы акция қала тұрғындарының табиғатқа деген жанашырлығын көрсетіп қана қоймай, қоғамдағы азаматтық белсенділіктің жоғары деңгейде екенін дәлелдеді.
Тазалық жұмыстары Шымкенттің барлық бес ауданында бір мезгілде өтті. Сенбілік барысында тұрғындар, жастар, түрлі мекеме қызметкері мен коммуналдық сала маманы бірлесіп, көшелерді, аулаларды, саябақтар мен қоғамдық орындарды күл-қоқыстан тазартты. Нәтижесінде, қала аумағының көптеген аймағы жаңа келбетке ие болды.
Әл-Фараби ауданының Терiскей шағынауданындағы №33, 35 және 37 тұрғын үйлердің аулалары тазартылып, балалар ойын алаңдары мен жасыл желектер ретке келтірілді. Коммуналдық қызмет пен тұрғындардың бірлескен еңбегі көпқабатты үйлер ауласына жаңаша сән берді.
Абай ауданына қарасты Ақжайық шағынауданындағы Асфендияров көшесінің бойы күл-қоқыстан аршылса, Еңбекші ауданында №30 мектептің аумағы мен маңы ретке келтірілді. Қаратау ауданында Нұртас шағынауданындағы Кеңжарық және Құлагер көшелері тазаланды. Ал Тұран ауданында Темірлан тасжолының бойындағы көпқабатты үйлердің аулалары абаттандырылды.
Сенбілікке қатысқан қала тұрғындары мұндай шаралардың маңыздылығын ерекше атап өтті.
– Табиғат – біздің аманатымыз. Әрбір аула мен көше, саябақтың таза болуы келер ұрпаққа қалдыратын мұрамыз. Бүгінгі сенбілік экологиялық мәдениетті қалыптастыру жолындағы маңызды қадам. Сондықтан мұндай бастамаларға барша тұрғындардың қатысуы қажет, – дейді акцияға белсенділік танытқан азаматтар.
Мұндай бастамалар тек қала тазалығын қамтамасыз етіп қоймай, қоғамдағы бірлік пен ынтымақты арттырады. Әрбір қатысушының еңбегі ортақ іске қосылған үлес ретінде бағаланып, тұрғындар арасында өзара сыйластық пен жауапкершілікті нығайтады.
Айта кетейік, тазалық жұмыстарына қала жастары да белсенді түрде қатысты. Шымкент қалалық Жастар ресурстық орталығының бастамасымен көптеген волонтер мен студент жастар акцияға атсалысып, өз үлестерін қосты. Олар қоғамдық орындарды тазалау, ағаш көшеттерін отырғызу және қоқыс қалдықтарын сұрыптау жұмыстарын жүргізді. Жастардың белсенділігі – экологиялық мәдениеттің болашақта тұрақты қалыптасуына негіз болмақ. Бұл орайда жас буынға табиғатты аялау мен қоршаған ортаны қорғаудың маңызын түсіндірудің мәні зор.
Назгүл НАЗАРБЕК,
Шымкент қаласы