АҚШ Иран аумағындағы үш ядролық байыту кешеніне әуе соққысын жасады. Бұл туралы Ақ үй ресми түрде хабарлады. Шабуылға Фордо, Натанз және Исфахан қалаларындағы стратегиялық маңызы бар ядролық нысандар іліккен.
Әскери операцияның барысын президент Дональд Трамп Ақ үйдің Ситуациялық бөлмесінен қадағалады. Ақ үй жариялаған фотосуреттерде Трамп вице-президент Джей Ди Вэнс, Мемлекеттік хатшы әрі ұлттық қауіпсіздік жөніндегі кеңесші Марко Рубио, Қорғаныс министрі Пит Хегсет, Ақ үй аппаратының басшысы Сюзи Уайлс және басқа да жоғары лауазымды тұлғалармен бірге отырғаны бейнеленген.
Трамптың операция кезінде киген ашық қызыл түсті баскиімі де көпшіліктің назарын аударды. Қалпақта оның танымал саяси ұраны – "Make America Great Again" ("Американы қайтадан ұлы ел етейік") деген жазу айқын көрінеді.
Фотосуреттерде олар ұзын ағаш үстелдің маңында жиналып, нақты уақыт режимінде операция барысын бақылап отырғаны көрінеді. Бұл – АҚШ әскери шешімдерінің қабылдану сәтін көрсететін сирек жарияланатын кадрлардың бірі.
