Қазақстанда жастар мен жас отбасылар үшін қолжетімді мөлшерлемедегі қандай ипотекалар бар? Мұндай бағдарламалардың бір бөлігі тек жастарға арналса, тағы бір бөлігі барша қазақстандыққа бағытталған, – деп хабарлайды Aikyn.kz krisha.kz-ке сілтеме жасап.
Аймақтық «Алматы жастары», «Елорда жастары», Qamqor, «Алатау жастары», т.б.
Бұл ипотекалар «Отбасы банк» пен жергілікті облыс/ қала әкімдіктерінің ортақ бағдарламасы. Қазақстанның барлық өңірінде жұмыс істейді. Әкімдіктер қатысушылар үшін арнайы критерийлер бекітеді. Критерийлер әр өңірде әртүрлі болуы мүмкін.
Шарттары:
- Пайыздық мөлшерлеме — 5–6 %.
- Бастапқы жарна — 10 %.
- Қарызға берілетін сома — 18 млн теңгеге дейін. Егер пәтердің бағасы тым қымбат болса, қалған соманы қатысушы өзі төлейді.
- Мерзімі — 19 жылға дейін
Талаптары:
- 35 жасқа дейін
- Қатысушының өзінде және жұбайында соңғы бес жылда баспанасы болмауы керек
- Қалада/облыста тұрақты тіркеу болуы
- Бастапқы жарнасының болуы
- Төмендегі мамандықтар бойынша 6 айдан кем емес тәжірибесі болуы:
- денсаулық сақтау;
- білім беру;
- мәдениет;
- спорт;
- ЖОО және ғылыми зерттеу институттары;
- журналистика;
- әлеуметтік сала
- құқық қорғау органдары;
- коммуналдық қызмет;
- Мәдениет саласындағы мамандар: мүсіншілер, суретшілер, дизайнерлер
Қандай үй сатып алуға болады?
Бірінші және қайталама нарықтағы тұрғын үйлер, үлестік қатысу арқылы баспана иелену.
Ерекшелігі
Балдық жүйелер:
- некеге тұрғаны және балалары болғаны үшін — 1 балдан беріледі;
- әр жұмыс тәжірибесі үшін — 2 балл;
- әлеуметтік жағдайы төмен болса — 5 балл.
Ипотеканы «Отбасы банк» береді. Өтініш қабылдау уақытын банк сайтынан немесе жергілікті әкімдік жаңалықтарынан бақылауға болады.
«Жас Отбасы» ипотекасы
Шарттары:
- Пайыздық мөлшерлеме — 5-6 %.
- Бастапқы жарна — 50 %.
- Қарыз көлемі — 100 млн теңгеге дейін.
- Мерзімі — 9 жылға дейін.
- "Отбасы банкте" жаңа депозит болуы.
- Бір жылдан кем емес уақыт депозит жиналуы.
- Баспана құнының 50%-ын «Отбасы банкте» жинап қою немесе бірден төлеу.
Талаптары:
- Некеге тұрған уақыты бес жылдан көп болмауы тиіс.
- Қатысушылардың жасы бойынша шектеу жоқ.
Қандай үй сатып алуға болады?
- Бірінші немесе қайталама нарықта үй алу.
- Жер участогын алып, үй салу.
Ерекшеліктері
- Баспана болмауы керек деген талаптар жоқ.
- Екінші, үшінші үй сатып алуға болады.
Бұл ипотека — "Отбасы банктің" жеке бағдарламасы. Несиелендіру кез келген уақытта шектеусіз қолжетімді.
«7-20-25» ипотекалық бағдарламасы
Бұл мемлекеттік әлеуметтік ипотекалық бағдарлама. Мерзімі – 2029 жылдың соңына дейін.
Шарттары:
- Пайыздық мөлшерлеме — 7 %.
- Бастапқы жарна — 20 %.
- Пәтер бағасы — 15–25 млн теңге.
- Мерзімі — 25 жылға дейін.
Талаптары:
- Өзінде немесе жұбайының атында соңғы бір жарым жылда баспана болмауы тиіс.
- Басқа ипотекалары болмауы керек.
- Тек бір рет қатысуға рұқсат етіледі.
Қандай үй сатып алуға болады?
- Құрылыс компаниялары жаңадан қолданысқа берген үй немесе жаңа пәтер.
Ерекшеліктері:
- Ипотеканы жеті банк береді: ЦентрКредит, Freedom, Halyk, РБК, Алтын, Форте, Еуразиялық банк.
- Банктерге өтініш беру, баспана іздеу ұзақ уақытқа созылуы мүмкін.
«Наурыз», «Отау» ипотекалары
«Отау» — «Отбасы банкінің» жеке бағдарламасы. «Наурыз» — мемлекеттік ипотека.
Алғашында бұл бағдарламаның шарттары әртүрлі болған. Бірақ 2024 жылдың күзінде «Отау» шарттары «Наурыз» шарттарымен теңестірілді. Биыл екі бағдарлама да наурыздан бастап іске қосылады.
Шарттары:
- Әлеуметтік осал топ өкілдері үшін пайыздық мөлшерлеме – 7%.
- Басқа қатысушылар үшін – 9%.
- Егер дайын баспана болса бастапқы жарна — 10%, толық бітпеген үй болса – 20%.
- Қарыз көлемі Астана мен Алматыда 36 млн теңгеге дейін, ал басқа аймақтарда 30 млн теңгеге дейін.
- Мерзімі — 19 жылға дейін.
- «Отбасы банкінде» 2 млн теңге көлемінде депозит болуы керек. Мерзімі маңызды емес.
Талаптары:
- Өзінде және жұбайының атында соңғы бес жылда баспана болмауы керек.
- Барлық адам қатыса алады, бірақ 35 жасқа дейінгі азаматтарға басымдық беріледі
Қандай үй сатып алуға болады?
- Астана, Алматы, Шымкентте және облыс орталықтарында тек бірінші нарықтағы пәтерлер
- Моноқалалардан, облыстардан жеке үйлер.
- "Отбасы банк" сайтынан да тұрғын үй іздеп табуға болады.
Ерекшеліктері
Балдық жүйе:
- депозит бойынша сыйақы — әр 1000 теңге үшін 1 балл
- ресми некеде болса — 5 балл;
- балалар үшін — 10 балл (бала санына қарамайды)
- әлеуметтік әлжуаз топқа жатады деген статус үшін — 10 балл;
- 35 жасқа дейін болса тағы да — 5 балл.
Сондай-ақ биыл «Жұмысшы мамандықтар жылы» аясында «Наурыз жұмыскер» атты жаңа ипотекалық бағдарлама іске қосылады.
Жаңа ипотекалық бағдарламаның шарттары мынадай:
- Мөлшерлеме – әлеуметтік осал адамдар үшін 7 % (жылдық тиімді сыйақы мөлшерлемесі 9.6%-ға дейін) және қалған санаттар үшін 9% (ЖТСМ 13% дейін).
- Бастапқы жарна: алғашқы пәтерді таза әрлеумен толық сатып алғанда 10%-дан, ал егер толық салынбаған және екінші нарықтағы үйлерде 20%-дан.
- Қарыздың ең жоғары сомасы Астана мен Алматы қалаларында – 36 млн теңге болса, өзге өңірлерде – 30 млн теңге.
Қатысушыларға қойылатын негізгі талап: саладағы кәсіпорында жұмыс істейтін қызметкер болуы керек. Мәселен, өнеркәсіп, энергетика, көлік, ауыл шаруашылығы, су ресурстары.